Avqustun
2-də M.V.Lomonosov adına Moskva Dövlət
Universitetinin (MDU) Bakı filialının rektoru,
professor Nərgiz Paşayeva bu nüfuzlu ali məktəbə
daxil olmuş tələbələr və onların valideynləri
ilə görüşmüşdür.
AzərTAc xəbər
verir ki, bu il MDU-nun Bakı filialının tətbiqi
riyaziyyat, kimya, filologiya və psixologiya
fakültələrinə 290-dan çox abituriyent imtahan
vermiş, tələbə adına isə 100 nəfər layiq
görülmüşdür.
Görüşdə qəbul
komissiyasının üzvləri, MDU-nun tanınmış
alimləri və professorları da iştirak etmişlər.
Tədbirdə çıxış
edən rektor Nərgiz Paşayeva tələbələri təbrik
edərək vurğulamışdır ki, bu gün onların
həyatında çox əlamətdar günlərdən biridir.
Tələbə adına layiq görülmüş gənclərin elmin
çətin və şərəfli yoluna qədəm qoyduğunu söyləyən
N.Paşayeva qəbul imtahanlarının yüksək səviyyədə
keçirilməsinə görə qəbul komissiyasının
üzvlərinə təşəkkür etmişdir. Rektor demişdir:
"Qəbul komissiyasının bütün üzvləri imtahanların
obyektiv və vicdanla keçirilməsi, məhz ən yaxşı
abituriyentlərin seçilməsi üçün səy
göstərmişlər. Həqiqətən ən yaxşı abituriyentlər
seçilmişlər".
MDU-nun Bakı
filialının tələbəsi adının şərəfli və eyni
zamanda məsuliyyətli ad olmasını vurğulayan
N.Paşayeva təhsil dövrünü bu tədris müəssisəsinə
qəbul edilmiş gənclərin həyatında ən mühüm
mərhələ adlandırmışdır. Rektor demişdir: "Biz
sizə sadəcə universiteti bitirmək haqqında sənəd
vermirik, biz sizə bilik veririk və siz bu
bilikləri qəbul etməlisiniz".
"Universitet
böyük sosial təsisatdır, burada təkcə
mütəxəssislər deyil, həm də şəxsiyyətlər
formalaşır", - deyən Nərgiz Paşayeva
vurğulamışdır: "Bizim başlıca vəzifəmiz sizi
müdrikliyə, biliklərə yaxınlaşdırmaqdır. Bizim
məqsədimiz mükəmməl insan yetişdirməkdir. Bu
uzun və çətin prosesdir, lakin biz buna
çalışacağıq".
N.Paşayeva
görüş iştirakçılarının nəzərinə çatdırmışdır ki,
tələbələrə M.V.Lomonosov adına MDU-nun yüksək
ixtisaslı pedaqoqları dərs deyəcəklər.
Mərasimdə
MDU-nun rus dili kafedrasının böyük müəllimi,
pedaqoji fəaliyyətinə görə Lomonosov mükafatı
laureatı Valeriya Baqryantseva,
fizika-riyaziyyat elmləri doktoru, professor
Yuri Sadovniçi, psixologiya elmləri namizədi
Andrey Kiselnikov, qəbul komissiyasının məsul
katibi, kimya elmləri doktoru Sergey Karlov
çıxış etmişlər. Onlar qeyd etmişlər ki, bu ali
məktəbə daxil olmuş bütün abituriyentlər yüksək
bilik, qabiliyyət və əzmkarlıq nümayiş
etdirmişlər. Vurğulanmışdır ki, M.V. Lomonosov
adına Moskva Dövlət Universitetində və MDU-nun
Bakı filialında tələbələr eyni tədris
proqramları üzrə təhsil alırlar.
Müəllimlər
tələbələri MDU-nun Bakı filialında yaradılmış
geniş imkanlardan maksimum səmərə ilə istifadə
etməyə çağırmışlar. Ali məktəbdə tədris
prosesinin yüksək səviyyədə təşkil olunmasında,
onun maddi-texniki bazasının möhkəmlənməsində
rektor Nərgiz Paşayevanın xidmətləri yüksək
qiymətləndirilmişdir. Qeyd edilmişdir ki,
filiala daim diqqət göstərilməsi Azərbaycanda
humanitar sahənin inkişafı üçün yaxşı zəmin
yaradır.
Çıxış edənlər
Azərbaycanda rus dilinə marağın yüksək
olmasından razı qaldıqlarını da bildirmişlər. Bu
il MDU-nun Bakı filialında ən böyük müsabiqə
filologiya fakültəsində olmuşdur. Filialın ən
gənc fakültəsi olan psixologiya fakültəsinə də
diqqət ilbəil artır.
AzərTAc |