|
 Naxçıvan
Dövlət Universitetinin dünya elminə uğurlu
inteqrasiyasında bu ali məktəbin dünyanın məşhur
ali təhsil ocaqları ilə çoxşaxəli beynəlxalq
əlaqələri mühüm rol oynayır. Təməli 1999-cu ildə
Təbiətşünaslıq fakültəsinin nəzdindəki
pediatriya ixtisası ilə qoyulan, 2003-cü ildən
müstəqil fakültə kimi fəaliyyət göstərən Tibb
fakültəsi isə bu əlaqələrin önündə gedir.
Naxçıvan Muxtar Respublikasında səhiyyənin
inkişafına, yerli tibbi kadrların
yetişdirilməsinə göstərilən yüksək diqqət və
qayğının təzahürüdür ki, fakültənin müəllim və
tələbələri Türkiyə Respublikasının Elazığdakı
Fırat, İzmitdəki Kocaeli, Kayseridəki Erciyez,
Ərzurumdakı Atatürk, Van 100-cü il, Qars, Ankara
universitetlərində istehsalat təcrübələri,
ixtisasartırma kursları keçirlər.
NDU-nun
rektoru, akademik İsa Həbibbəyli ilə Türkiyənin
Kayseri şəhərindəki Erciyez Universitetinin
rektoru, professor, doktor Fəxrəddin Keleştetmur
arasında bağlanan müqavilə əsasında bu
yaxınlarda Tibb fakültəsinin 20 nəfər müxtəlif
kurs tələbəsi adıçəkilən universitetdə
istehsalat təcrübəsində oldu. Fakültənin dekanı,
dosent Bəhruz Məmmədov, Naxçıvan MR-in əməkdar
həkimi, fakültənin baş müəllimi, tibb elmləri
namizədi İsa Abdullayev, Azərbaycan
Respublikasının əməkdar müəllimi Kubra Cəfərova,
universitetin kliniki xəstəxanasının baş həkimi
Yaşar Rzayev də heyətə qatılmışdılar.
Erciyez
Universitetinin rektoru, professor, doktor
Fəxrəddin Keleştetmur, Tibb fakültəsinin dekanı,
professor, doktor Məhəmməd Güvən, Tibb
fakültəsinin xəstəxanalarının baş həkimi Qudrət
Doğru başda olmaqla kollektiv Naxçıvandan gələn
heyəti yüksək qonaqpərvərliklə, hərarətlə
qarşıladı.
Universitetin
Tibb fakültəsinin 1500 çarpayılıq 5 xəstəxanası
- Hematologiya-onkologiya, Orqan köçürülməsi və
dializ, Ürək və damar xəstəlikləri, Uşaq
xəstəxanaları, Sümük iliyi köçürülməsi mərkəzi
var. Bu xəstəxanalar Kayseri şəhəri ilə yanaşı,
Aksaray, Nevşehir, Yozqat, Kahramanmaraş və
digər ətraf bölgələrin də əhalisinə yüksək
səviyyəli tibbi xidmət göstərərək xalqın
sağlamlığı keşiyində durur. Bu səhiyyə ocaqları
eyni zamanda fakültə üçün fundamental təcrübə və
elmi-tədqiqat mərkəzi rolunu oynayır.
Fakültə
dekanı, professor, doktor Məhəmməd Güvən və baş
həkim Qudrət Doğrunun təşkilatçılığı və qayğısı
ilə Uşaq xəstəxanasında, Cərrahiyyə, Daxili
xəstəliklər, Endokrinologiya, Ağciyər
xəstəlikləri, Hemotologiya, Onkologiya, Təcili
tibbi yardım, Doğum şöbələrində müxtəlif
xəstəliklərin müayinəsində fəal iştirak edən
gələcək həkimlərimiz müasir müalicə üsullarını,
ən yeni tibbi texnologiyadan istifadəni
öyrəndilər.
Yerli həkimlər
tələbələrimizdən Əfsun Ənnağıyev, Elvin Əliyev,
Şəfa İsgəndərova, Fəxriyyə Məmmədova, Çinarə
Ağahəsənova və Aydan Hüseynlinin nəzəri bilik
səviyyələrindən və praktik məlumatlarından
razılıqla söz açdılar.
Səfər
çərçivəsində Kayseridə 2006-cı ildən fəaliyyət
göstərən, 60 üzvü olan Türk Dünyası Qadınları
Dayanışma Mərkəzində də olduq. Dəmət Ərkılıçın
rəhbərliyi, Fəzilət Keleştetmurun təşkilatçılığı
ilə türkdilli xanım tələbələri öz ətrafında sıx
birləşdirən dərnək onların sosial məişətləri ilə
maraqlanır, problemlərinin həllində dəstək olur.
Səfər zamanı
naxçıvanlı qonaqlar üçün şəhərin 15 km
cənub-qərbində, 3917 m yüksəklikdə yerləşən
Erciyez dağına, qədim insan məskənlərinin
yerləşdiyi Kapadokya muzey-şəhərinə ekskursiya
təşkil olunmuşdur.
İstehsalat
təcrübəsinin sonunda uni
versitet
rəhbərliyi tərəfindən yaddaqalan vida mərasimi
hazırlandı. Rektor, professor Fəxrəddin
Keleştetmurun, fakültə dekanı və xəstəxanaların
baş həkimlərinin iştirakı ilə keçirilən
tədbirdə universitetimizin Tibb fakültəsinin
dekanı, dosent Bəhruz Məmmədov yüksək
qonaqpərvərlik və səmimi münasibət üçün
kollektivimizin minnətdarlığını çatdırdı. Sonda
müəllim və tələbələrimizə sertifikatlar təqdim
olundu.
Mehriban SULTAN |
|
