|
 Avqustun
1-də Səbail Rayon İcra Hakimiyyətinin təşəbbüsü,
Quba Rayon İcra Hakimiyyəti, DİN Daxili Qoşunlar
Komandanlığı və "Çağ" Öyrətim Şirkətinin birgə
layihəsi əsasında Qababağ müharibəsi əlilləri və
veteranlarının, aztəminatlı və imkansız
ailələrin uşaqları, təhsildə fərqlənən
şagirdlər, həmçinin "SOS-Azərbaycan" uşaq
kəndində tərbiyə alan ümumilikdə 200 nəfər
yeniyetmə üçün Quba şəhərinin ən mənzərəli
yerində yerləşən Quba Azərbaycan-Türkiyə Özəl
Liseyinin bazasında yaradılmış
hərbi-vətənpərvərlik təmayüllü "Şahinlər" yay
istirahət düşərgəsinə yola salınma mərasimi
keçirilmişdir.
Tədbir Daxili
Qoşunların hərbi orkestri tərəfindən Azərbaycan
Respublikasının Dövlət himninin ifası ilə
başlanmışdır.
Səbail
rayonunun rəhbərliyi, DİN Daxili Qoşunlar
Komandanlığının, düşərgəyə yollanan
yeniyetmələrin, onların valideynlərinin, rayon
ictimaiyyətinin nümayəndələrinin iştirakı ilə
"Sahil bağı"nda təşkil olunan yolasalma
mərasimində çıxış edən Səbail Rayon İcra
Hakimiyyətinin başçısı Asif Əsgərov ölkə
Prezidenti cənab İlham Əliyevin yeniyetmə və
gənclərin sağlam böyüməsi, gənc nəslin vətənə
məhəbbət, Azərbaycan dövlətçiliyinə sədaqət
ruhunda tərbiyə olunması istiqamətində gördüyü
işlərdən, yeniyetmələrə olan diqqət və qayğıdan,
bu istiqamətdə Səbail rayonunda görülən işlər və
həyata keçirilən layihələrdən danışmış, uşaqlara
şən və yaddaqalan istirahət arzulamışdır. Qeyd
olunmuşdur ki, düşərgənin fəaliyyəti Səbail RİH
və layihədə iştirak edən təşkilatçıların diqqət
mərkəzində olacaq, burada istirahət üçün hər cür
şərait yaradılacaqdır.
 Qeyd
etmək lazımdır ki, Bakıdan gedən uşaqlara
Qubadakı düşərgədə rayonun H.B.Zərdabi adına
Xüsusi İnternat-məktəbin şagirdləri də
qoşulacaqlar. Düşərgənin hərbi-vətənpərvərlik
təmayüllü olması nəzərə alınaraq Səbail RİH
tərəfindən bir sıra təşkilati işlər görülmüş,
bir neçə gün əvvəl istirahətə göndərilən uşaqlar
və onların valideynləri, düşərgədə çalışacaq
dəstə rəhbərləri ilə görüş keçirilərək düşərgədə
istirahətin təşkili, daxili qaydalar,
keçiriləcək tədbirlər barədə ətraflı məlumat
verilmişdir. Uşaqlar üçün xüsusi geyim formaları
və lazımi idman ləvazimatları alınmış, Daxili
Qoşunların Quba şəhərindəki "N" saylı hərbi
hissəsi tərəfindən düşərgənin həyətində
hərbi-səhra çadırları, səhra yeməkxanası
qurulmuş, Daxili Qoşunların vəzifələri və döyüş
yolu, buradakı xidmət, döyüş texnikası və
təminat barədə, həmçinin Milli Qəhrəman Mübariz
İbrahimova və "Şahinlər" düşərgəsinin əvvəlki
illərinə həsr olunmuş stendlər
quraşdırılmışdır.
Düşərgə Daxili
Qoşunlar Komandanlığı və Quba ATÖL tərəfindən
bütün lazımi ləvazimatlarla təmin olunmuşdur.
Düşərgədə yeniyetmələr gündə 4 dəfə yüksək
kalorili yeməklə, təzə meyvə və tərəvəz, süd
məhsulları ilə təmin olunacaq, istirahət
dövründə onlar üçün bir neçə dəfə təbiət
qoynunda nahar təşkil ediləcəkdir.
Bu il
düşərgədə uşaqların təlim-tərbiyə işləri ilə
rayonun orta məktəblərində çalışan fiziki
tərbiyə müəllimləri və GÇH rəhbərləri məşğul
olacaqlar. Həmçinin düşərgəyə təhkim olunmuş
Daxili Qoşunların zabitləri, çavuş və
əsgərlərindən ibarət qrup burada aparılacaq
hərbi hazırlıq, təlim-tərbiyə işlərində yaxından
iştirak edəcəklər. Düşərgədə uşaqların
istirahətinin maraqlı və yaddaqalan olması üçün
məşğələlər hərbi nizamnaməyə uyğun tərzdə
hərbçilər tərəfindən keçiriləcəkdir. Düşərgənin
mühafizəsi və təhlükəsizlik məsələləri də DQ
tərəfindən həyata keçiriləcəkdir.
İstirahət
günlərində şagirdlərin Qubanın görməli
yerlərinə, tarixi guşələrinə, meşələrə
gəzintiləri təşkil olunacaq, onlar həm də Daxili
Qoşunların Qubadakı hərbi hissəsi ilə yaxından
tanış olacaqlar.
Düşərgədə
məktəblilərə vətənimizin, xalqımızın tarixindən,
ordu həyatından bəhs edən müxtəlif mövzularda
məşğələlərin keçirilməsi və hərbçilərin
bilavasitə iştirakı ilə ibtidai hərbi hazırlıq,
mülki müdafiə və ilk tibbi yardım təlimlərinin
təşkil olunması da planlaşdırılıb.
Daxili
Qoşunların orkestrinin marş sədaları altında
yeniyetmələr valideynləri ilə görüşüb
avtobuslara əyləşmiş və Qubaya yola düşmüşlər.
Yola düşməzdən
əvvəl gənc "şahinlər" ulu öndər Heydər Əliyevin
abidəsini ziyarət edərək abidə önünə çiçək
dəstələri düzmüşlər.
"Azərbaycan müəllimi" |
