Azərbaycan
Respublikası Mədəniyyət və Turizm Nazirliyinin
F.Köçərli adına Respublika Uşaq Kitabxanası "Azərbaycanın
görkəmli elm və mədəniyyət xadimləri"
seriyasından növbəti biblioqrafik göstəricilər
kitabını şair, ədəbiyyatşünas, Azərbaycan
Respublikasının əməkdar mədəniyyət işçisi,
filologiya elmləri doktoru, professor Rafiq
Yusifoğlunun həyat və yaradıcılığına həsr
etmişdir. Soraq kitabının tərtibçisi "Göyərçin"
jurnalının baş ədəbi işçisi Günel Almaz, elmi
məsləhətçi Azərbaycan Respublikasının əməkdar
mədəniyyət işçisi, F.Köçərli adına Respublika
Uşaq Kitabxanasının direktoru Fizurə Quliyeva,
redaktoru isə kitabxananın əməkdaşı Sevil
Əhmədovadır.
"Şirvannəşr"in çap elədiyi bu kitabda
tərtibçinin yığcam ön sözü, R.Yusifoğlunun
həyatı, bədii, elmi-pedaqoji fəaliyyətinin əsas
tarixləri, tərcümeyi-halı, çap olunan 53
kitabının, şeirlərinin, hekayələrinin,
məqalələrinin, dərsliklərə düşən əsərlərinin,
yaradıcılığı haqqında yazılan kitab və
məqalələrin siyahısı verilmişdir. 3592
biblioqrafik göstəricini əks etdirən bu soraq
kitabı tədqiqatçılara, kitabxana işçilərinə,
müəllimlərə, ədəbiyyat həvəskarlarına töhfədir. |
|