|
 Təhsil
nazirinin müavini Elmar Qasımov tədbir
iştirakçılarını təhsil naziri Misir Mərdanovun
adından salamlayaraq Dövlət Proqramı
çərçivəsində xarici ölkələrin ali məktəblərinə
daxil olan gəncləri və onların valideynlərini
təbrik etdi. E.Qasımov Dövlət Proqramına
düşməyin tələbələr üçün böyük şərəf olduğunu və
onların bu etimadı doğruldacaqlarına ümid
etdiyini iştirakçıların nəzərinə çatdırdı.
Bildirdi ki, ulu öndər Heydər Əliyevin ideyaları
əsasında formalaşan və dünya təhsil sisteminə
sürətlə inteqrasiya edən Azərbaycan təhsili
yüksək inkişaf mərhələsindədir. Azərbaycan
Respublikası müstəqilliyini bərpa etdikdən sonra
təhsillə bağlı bir çox islahatlar və dövlət
proqramları həyata keçirilmişdir ki, bunlardan
biri də xaricdə təhsil üzrə Dövlət Proqramıdır.
Möhtərəm Prezidentimiz İlham Əliyevin imzaladığı
bu Proqram nəticəsində 2007-2015-ci illərdə
dünyanın müxtəlif ölkələrində yerləşən nüfuzlu
ali təhsil müəssisələrində 5000 nəfər gəncin
təhsil alması nəzərdə tutulur. Bütün bunlar
Azərbaycan Respublikasının Prezidenti cənab
İlham Əliyevin təhsilə, elmə göstərdiyi diqqət
və qayğının nəticəsidir. Azərbaycanda elmin,
təhsilin maddi-texniki bazası və kadr potensialı
əsasən XX əsrdə formalaşıb. Ümummilli lider
Heydər Əliyev hələ 1970-1980-ci illərdə
Azərbaycanda hakimiyyətdə olarkən gəncləri
kütləvi şəkildə SSRİ-nin müxtəlif ali
məktəblərinə göndərməklə yüksək ixtisaslı
mütəxəssislərlə təminat baxımından respublikanın
qabaqcıl mövqeyə çıxmasına yeni imkanlar
yaratmışdır.
 Ulu
öndər Heydər Əliyevin həmin siyasəti bu gün də
uğurla həyata keçirilir. Dövlətin göstərdiyi
diqqət və qayğını yüksək qiymətləndirməyi və
respublikamızın gələcək rifahı naminə var
gücləri ilə çalışmalarını tələbələrə məsləhət
görən nazir müavini, təhsil aldıqları ölkələrdə
dövlətimizi ləyaqətlə təmsil etməyi,
Azərbaycanın səfirlikləri və diasporaları ilə
sıx əməkdaşlıq etməyi, təhsilimiz,
mədəniyyətimiz, tariximiz haqqında əcnəbi
vətəndaşlara məlumat vermələrini, yüksək
ixtisaslı bir mütəxəssis kimi vətənə dönmələrini
tövsiyə etdi.
Sonra nazir müavini Elmar Qasımov Dövlət
Proqramı ilə təhsil almağa gedən tələbələri
iştirakçılara təqdim edərək daxil olduqları
universitetlərin adlarını açıqladı. Onlara
gələcək həyatlarında müvəffəqiyyətlər arzuladı.
Tədbirdə çıxış edən valideynlər və tələbələr
yaradılan belə şəraitə görə dövlət başçısı cənab
İlham Əliyevə və təhsil naziri Misir Mərdanova
dərin minnətdarlıqlarını bildirdilər.
Niyazi RƏHİMOV |
