|
Yeni dərs ilinə hazırlıqla əlaqədar paytaxtın
Səbail rayonunda yerləşən 239 nomrəli orta
məktəbdə cari təmir işləri yüksək səviyyədə
aparılıb. Məktəbin direktoru Sədaqət Əzimovanın
verdiyi məlumata görə, sinif otaqları, dəhlizlər
təmir olunub, pəncərə və qapıların sıradan
çıxmış şüşə və avadanlıqları yeniləri ilə əvəz
olunub. Sanitar qovşağı, su xətləri yenilənib,
təmir olunub. Məktəbin həyətində abadlıq işləri
görülüb, binanın çöl divarları rənglənib.
Məktəb yeni dərs ilinə hazırdır.
Təhsil ocağının uğurlarına gəldikdə isə ötən il
məktəbi bitirən məzunların 60%-i respublikamızın
nüfuzlu ali məktəblərinə daxil olub. Onlardan 4
nəfəri 650-dən, 1 nəfəri 600-dən, 7 nəfəri isə
500-dən çox bal toplayıb. Məktəbin məzunu Nicat
Məmmədli 695 bal toplayaraq Azərbaycan Dövlət
Neft Akademiyasına daxil olub.
Milli Kurikulumun tətbiqi ilə bağlı 2011-2012-ci
dərs ilində I siniflərdə dərs deyəcək müəllimlər
üçün birhəftəlik təlim kursları keçirilib. Təlim
kurslarını müvəffəqiyyətlə bitirən 4 nəfər
müəllim sertifikat alıb. Kollektiv ötən dərs
ilində əldə etdiyi uğurları bu il daha da
artırmaq və möhkəmləndirmək əzmindədir.
Qeyd edək ki məktəbin şagirdləri yay
istirahətini də səmərəli şəkildə keçirmişlər.
Belə ki, məktəbin 4 nəfər şagirdi Təhsil
Nazirliyi və Gənclər və İdman Nazirliyinin birgə
təşkilatçılığı ilə iyul ayında Türkiyənin
Antalya şəhərində olmuş, 10 nəfər isə Səbail
Rayon İcra Hakimiyyətinin və Daxili Qoşunların
birgə həyata keçirdiyi layihə üzrə Qubada
vətənpərvərlik mövzusunda keçirilən treninqlərdə
iştirak edib.
Niyazi RƏHİMOV |
