|
 Respublikamızın
bütün bölgələrində olduğu kimi, Goranboy
rayonunda da "Regionların sosial-iqtisadi
inkişafı Dövlət Proqramı"na uyğun olaraq yeni
məktəb binalarının tikintisi davam edir.
Goranboy Rayon Təhsil Şöbəsinin müdiri İlham
Hüseynovdan aldığımız məlumata görə, hazırda
rayonda 4 məktəb binasının tikintisi başa çatmaq
üzrədir. Hazırda burada son tamamlama işləri
aparılır. Məktəblər yeni dərs ilində istifadəyə
veriləcək.
Tikintisinə
2010-cu ilin sentyabr ayında başlanan 420 yerlik
şəhər 3 nömrəli tam orta məktəb Heydər Əliyev
Fondunun vəsaiti hesabına tikilib. Məktəbdə 21
sinif otağı, 6 fənn kabineti, fizika və kimya
laboratoriyaları, kitabxana, kompüter və tibb
otaqları, bufet, akt və idman zalları vardır.
Təhsil ocağında müasir istilik sistemi
quraşdırılmış, su xətti və transformator
yenilənmişdir. Məktəbin həyətində yeni idman
meydançası tikilmişdir.
Təhsil
Nazirliyinin vəsaiti hesabına inşa olunan
Tatarlı kənd tam orta məktəbi 360 nəfər şagird
üçün nəzərdə tutulub. Geniş sinif otaqları və
laboratoriyaları olan məktəb müasir inventar və
avadanlıqlarla təmin olunub.
Səmədabad kənd
tam orta məktəbi 220 yerlikdir. Təhsil
Nazirliyinin vəsaiti ilə inşa olunan məktəbin
tikintisi 2011-ci ilin aprel ayından başlayıb.
Məktəbdə 11 sinif otağı, fizika, kimya
laboratoriyaları, kitabxana, akt və idman
zalları mövcuddur. Məktəb üçün köməkçi binalar
tikilmiş, su anbarları inşa edilmişdir.
Rayonda inşa
olunan digər məktəb isə 180 yerlik Şadılı kənd
tam orta məktəbidir. Məktəbdə 9 sinif otağı,
laboratoriyalar, fənn kabinetləri, kitabxana,
akt və idman zalları mövcuddur. Məktəbdə müasir
tipli istilik sistemi quraşdırılıb.
Niyazi RƏHİMOV |
