Şimali Qafqazın ali təhsil müəssisələrinin bir
qismi bağlana bilər
Bu il Rusiyanın təhsilə nəzarət qurumu Şimali
Qafqazın ali təhsil müəssisələrində təhsilin
keyfiyyəti ilə bağlı geniş yoxlamalara
başlayacaq. Yoxlamaların nəticələrinə əsasən,
ali təhsil müəssisələrinin bir qisminin
bağlanması və ya birləşdirilməsi gözlənilir. Bu
barədə federal dairənin sosial-iqtisadi inkişafı
məsələləri üzrə hökumət Komissiyasının iclasında
RF-in elm və təhsil naziri Andrey Fursenko
bildirib. Nazirin dediyinə görə, bu gün Şimali
Qafqazda 67 ali təhsil müəssisəsi və 61 filial
fəaliyyət göstərir. "Lakin onların heç də
hamısının fəaliyyəti effektli deyil", - deyə
Fursenko qeyd edib. Bir sıra ali məktəblərdə "stul
və kompüterdən başqa heç nə yoxdur" deyən
hökumət başçısı Vladimir Putin də onunla
razılaşıb. Baş nazirin sözlərinə görə,
keyfiyyətlə işləyən iri təhsil mərkəzlərinin
yaradılması zəruridir. Belə mərkəzlərdən biri
prezidentin fərmanı ilə Stavropolda yaradılmış
Şimali Qafqaz Federal Universiteti ola bilər.
Hazırda bu ali məktəb dairənin bir neçə təhsil
müəssisəsini özündə birləşdirir ki, onlarda da
45 minə yaxın tələbə təhsil alır. Yaxın iki-üç
il ərzində universitetə yardım məqsədi ilə 5
milyard rubl ayrılması nəzərdə tutulur.
Tələbələr işəgötürənlərə yaxınlaşdırılır
Rusiya Federasiyasının Dövlət Duması iyulun 7-də
ilk oxunuşda "Ali və ali məktəbdən sonrakı
professional təhsil haqqında" qanuna ali
məktəblərin qəyyumlar (hamilər) şurasının
səlahiyyətlərini genişləndirən düzəlişləri
bəyənib. Qəyyumlar (hamilər) şuralarının
tərkibinə işəgötürənlərin, habelə RF
subyektlərinin icraedici orqanlarının, yerli
özünüidarə orqanlarının nümayəndələri, ali
məktəblərin inkişafında maraqlı olan digər
şəxslər daxil edilə bilər.
Qəyyumlar şuraları təhsil proqramlarının
işəgötürənlərin tələblərinə uyğunlaşması üçün
onların işlənib hazırlanmasında, habelə təhsil
müəssisəsinin maddi-texniki bazasına aid
məsələlərin həllində iştirak edə bilərlər.
İmtahanlardan 100 bal yığanlar mükafat alıblar
Rusiya Federasiyasının Tomsk şəhərindəki lisey
və gimnaziyaların Vahid Dövlət İmtahanından 100
bal toplamış ən yaxşı məzunlarına şəhər merinin
mükafatları verilib. 13 nəfər gənc tomsklı adama
20 min rubl alıblar. Təltif olunan məzunların
əksəriyyəti təhsil müəssisələrini qızıl və gümüş
medallarla bitirənlər, ümumrusiya olimpiada və
müsabiqələrinin mükafatçılarıdır.
Mükafatların verilməsi mərasimində qeyd olunub
ki, Tomsk məktəbliləri artıq 10-cu ildir VDİ
verir və imtahanlarda yüksək bal toplayanların
sayı ildən-ilə artır.
Məlum olub ki, 13 yüzballı abituriyentdən cəmi
3-ü MDU-ya daxil olmağı planlaşdırıb, yerdə
qalanlar ali təhsillərini Tomskın milli tədqiqat
universitetlərində almaq fikrindədir.
"Uçitelskaya qazeta"dan
hazırladı: Yusif ƏLİYEV |