|
 Azərbaycan
Prezidenti İlham Əliyev Quba rayonuna səfəri
çərçivəsində Nizami adına mədəniyyət və
istirahət parkında aparılan yenidənqurma işləri
ilə tanış olmuş, Şahmat Məktəbinin açılışında
iştirak etmişdir.
Parkda yerləşən birmərtəbəli Şahmat Məktəbinin
köhnə binası sökülmüş, yerində ikimərtəbəli yeni
bina inşa edilmişdir.
Prezident İlham Əliyev Şahmat Məktəbinin rəmzi
açılışını bildirən lenti kəsdi.
Top fiquru formasında inşa olunan Şahmat
Məktəbinin binası parka xüsusi gözəllik verir.
Məktəbin birinci mərtəbəsinin foyesində ulu
öndər Heydər Əliyevin və Prezident İlham
Əliyevin ölkəmizdə şahmatın inkişafına və
şahmatçılara göstərdikləri yüksək diqqət və
qayğını əks etdirən fotoguşələr yaradılmışdır.
Burada 1983-cü ildə fəaliyyətə başlayan Quba
Şahmat Məktəbinin və onun yetirmələrinin əldə
etdikləri nailiyyətlər, kubok və diplomlar
nümayiş olunur.
Məktəbin birinci mərtəbəsində kompüter salonu və
6 məşğələ otağı fəaliyyət göstərir. Bütün
otaqlar simsiz İnternet şəbəkəsi ilə təmin
edilmişdir. İkinci mərtəbədə 300-350 idmançının
eyni vaxtda mübarizə apara biləcəyi zal vardır.
Zalda keçirilən yarışları monitorlar vasitəsilə
də izləmək mümkündür. Burada məşğələ otaqları və
inzibati otaqlar yerləşir.
Diqqətə çatdırıldı ki, Quba Şahmat Məktəbinin
rayondakı 11 ümumtəhsil məktəbində
nümayəndəlikləri də fəaliyyət göstərir.
Dövlətimizin başçısı görülmüş işləri yüksək
qiymətləndirdi, tövsiyə və tapşırıqlarını
verdi.
AzərTAc |
