Mingəçevir Şəhər İcra Hakimiyyəti və Azərbaycan
Müəllimlər İnstitutunun Mingəçevir filialının
birgə təşkilatçılığı ilə Azərbaycanın dövlət
müstəqilliyinin bərpasının 20-ci ildönümünə həsr
edilmiş "Elmimiz və təhsilimiz 20 ildə" adlı
elmi-nəzəri konfrans keçirilmişdir.
Konfransda AMİ-nin Mingəçevir filialının,
Mingəçevir Politexnik İnstitutunun və Mingəçevir
Turizm Kollecinin professor- müəllim heyəti, elm
adamları və şəhər ictimaiyyəti nümayəndələri
iştirak edirdilər.
Konfrans iştirakçıları əvvəlcə ulu öndər Heydər
Əliyevin abidəsini ziyarət edib, abidə önünə gül-
çiçək dəstələri qoydular.
Konfransı giriş sözü ilə AMİ-nin Mingəçevir
filialının direktoru, fizika-riyaziyyat elmləri
doktoru, professor Orucəli Rzayev açaraq
müstəqilliyimizin töhfəsi olan AMİ-nin
Mingəçevir filialı və onun son illərdəki
uğurları haqqında məlumat verdi. Regionun
qabaqcıl ali təhsil müəssisələrindən sayılan
AMİ-nin Mingəçevir filialında bu gün Riyaziyyat
və informatika, Riyaziyyat və fizika, İbtidai
sinif müəllimliyi, İngilis dili, Azərbaycan dili
və ədəbiyyat ixtisasları üzrə 600-dən artıq
tələbənin təhsil aldığı və tələbələrin elmlərin
sirlərinə səylə yiyələndiyi qeyd edildi.
Mingəçevir Şəhər İcra Hakimiyyəti başçısının
birinci müavini, siyasi elmlər üzrə fəlsəfə
doktoru İlham İsmayılov "Azərbaycan elmi və
təhsili 20 ildə" adlı məruzə ilə çıxış etdi.
Sonra konfrans öz işini bölmələrdə davam
etdirdi.
İctimai, humanitar, texniki və təbiət elmləri
bölmələrində ümumilikdə 61 məruzə dinlənildi.
Filialın akt zalında keçirilən bağlanış
mərasimində çıxış edən professor Orucəli Rzayev
konfransın əhəmiyyətindən danışıb, burada
aparılan qarşılıqlı fikir mübadilələrinin
regionun ali məktəblərində çalışan professor-
müəllim heyəti və tələbələr üçün faydalı
olduğunu vurğulayıb.
Sonra bölmə rəhbərləri öz hesabatlarını təqdim
etdilər. Onlar bölmələrdə müzakirə olunan
məsələlərin səmərəliliyini daha da artırmaq üçün
rəy və təkliflərini bildirib, bu kimi
konfransların mütəmadi keçirilməsinin
məqsədəmüvafiq olduğunu qeyd etdilər.
Sonda konfrans iştirakçıları AMİ-nin Mingəçevir
filialının Kompüter mərkəzi, laboratoriya və
kabinetləri ilə tanış oldular.
Rahilə HƏSƏNOVA,
AMİ-nin Mingəçevir filialının pedaqoji
fakültəsinin dekan müavini |