|
 Bakı
Dövlət Universitetinin rektoru, akademik Abel
Məhərrəmov İtaliyanın La Sapienza
Universitetinin professoru Anjelo Çianesenin
başçılıq etdiyi nümayəndə heyətini qəbul edib.
Təmsil etdiyi ali təhsil ocağı haqqında danışan
professor bildirib ki, La Sapienza Universiteti
1303-cü ildə təsis edilib və İtaliyanın ən qədim
universitetlərindən biridir. 145000 tələbəsi
olan universitetin 4500 professoru var və
300-dən çox istiqamətdə tələbə hazırlayır.
Nümayəndə heyətinin rəhbəri Anjelo Çianese
görüşün məqsədinin universitetlər arasında
əməkdaşlıq olduğunu bildirib.
Sonra BDU haqqında qonaqlara məlumat verən
rektor, akademik Abel Məhərrəmov universitetin
Boloniya prosesinə qoşulduğunu deyib. Bildirib
ki, bu sistemin əsas məqsədi universitetlər
arasında inteqrasiyanı gücləndirməkdir. Bu
baxımdan ölkədə çoxlu islahatların həyata
keçirildiyini, bu mühiti Azərbaycan
universitetlərinə gətirmək üçün xaricə
tələbələrin göndərildiyini də qonaqların
nəzərinə çatdırıb. Daha sonra rektor BDU-nun 37
xarici proqram və qrant üzrə işlədiyini bildirib.
Qonaqlar BDU-nun Nanotexnologiya Mərkəzi,
İmmunologiya, Kimya, Nüvə-maqnit rezonans
laboratoriyaları, Elektron monitorinq mərkəzi
ilə tanış olublar.
Nümayəndə heyətinə La Sapienza Universitetinin
cərrahlıq üzrə professoru Anjelo Filippin,
memarlıq üzrə professoru Roberto Cherubin,
Avropa tarixi üzrə professoru Fransesko Guni və
Beynəlxalq əlaqələr departamentinin rəhbəri
Mikaela Lepore də daxil olublar.
Avropa tarixi üzrə professor Fransesko Guni
universitet tələbələrinə mühazirə oxuyub.
BDU-nun Mətbuat və informasiya şöbəsi |
