Xalqımızın
görkəmli mütəfəkkiri Həsən bəy Zərdabi müəllim
adını uca tutaraq demişdir: "Əgər məndən
soruşsaydılar ki, ən şərəfli sənət hansıdır? Mən
o zaman iftixarla belə deyərdim: müəllimlik".
Əlbəttə, bu şərəfli peşənin müqəddəsliyini
qoruyub-saxlamaq da hər müəllimə nəsib olmur.
Bunun üçün böyük iradə, əzmkarlıq, özünə qarşı
tələbkarlıq, qabiliyyət və bacarıq tələb olunur.
Məhz belə keyfiyyətlərə malik müəllimlərin
sayəsində təhsilimiz inkişaf edir və çağdaş
cəmiyyətimiz üçün gərəkli olan əsl
vətənpərvərlər formalaşır.
Belə müəllimlərdən biri də Pərvanə Talıbovadır.
O, 1970-ci ildə Oğuz rayonunda anadan olmuşdur.
1988-ci ildə rayonun 2 nömrəli orta məktəbini
bitirmiş və bir müddət rayonda pioner və
məktəblilər evində musiqi dərnəyinin rəhbəri
işləmişdir. Sonra N. Tusi adına APİ -nin (indiki
ADPU) pedaqoji-əlavə musiqi fakültəsinə daxil
olmuşdur. 1994-cü ildə ali məktəbi bitirdikdən
sonra Xarici dillər təmayüllü gimnaziyada
ibtidai sinif müəllimi işləmişdir. Gimnaziyada
çalışdığı vaxtda ümummilli liderimiz Heydər
Əliyevin yubileyinə həsr olunmuş tədbirdə dərs
dediyi III sinif şagirdləri sözləri və musiqisi
müəllimləri P.Talıbovaya məxsus "Yaşa, yaşa
Heydər baba" mahnısı ilə çıxış etmişlər.
Hazırda Pərvanə Talıbova Bülbül adına Bakı
Orta İxtisas Musiqi Məktəbində sinif müəllimi
işləyir. O, müasir dərsə verilən tələbləri
özünün pedaqoji təcrübəsinə əsaslanaraq belə
xarakterizə edir:
- Dərs prosesi zamanı müasir dərsə verilən
bütün tələblərə əməl etməklə yanaşı təlimin
texniki vasitələrindən səmərəli istifadə etməyə
çalışıram. Xüsusilə dərs vaxtı interaktiv tədris
metodlarına daha çox üstünlük verir və
şagirdlərimə bir şəxsiyyət kimi yanaşıram.
P.Talıbova məktəbdə keçirilən bütün kütləvi
tədbirlərdə fəal iştirak edir. Bu yaxınlarda
rəhbərlik etdiyi sinif şagirdləri ilə birgə
"SOS" Uşaq kəndində xeyriyyə tədbiri keçirməsi
də onu pedaqoji kollektivin sevimlisinə
çevirmişdir.
Bu gün müəllimlik fəaliyyəti ilə yanaşı
P.Talıbova yaradıcılığa da geniş yer verir.
Onun müxtəlif mətbuat səhifələrində, o cümlədən,
"Elmi əsərlər", "Kurikulum" və "Milli pedaqogika
məktəbi" kimi jurnallarda çap olunmuş
elmi-metodiki məqalələri pedaqoji ictimaiyyət
tərəfindən rəğbətlə qarşılanmışdır.
2011-ci ilin iyun ayından Bakı Pedaqoji
Kadrların İxtisasartırma və Yenidənhazırlanma
İnstitutunda lektor kimi fəaliyyət göstərən
Pərvanə müəllim bir çox kurslarda fəal iştirak
etdiyinə görə yüksək səviyyəli sertifikatlar
almışdır. O, Təhsil Problemləri İnstitutunda
Kurikulum Mərkəzinin Azərbaycan dili fənni üzrə
işçi qrupunun üzvüdür. Bu günlərdə isə Təhsil
Nazirliyinin təsdiqi ilə Pərvanə Talıbovanın
müəllifi olduğu ibtidai siniflərə aid "Sehrli
mələklər" adlı sinifdənxaric oxu - metodik
vəsait çapdan çıxıb.
Şakir CƏFƏROV |