|
Noyabrın 3-də Bakı Pedaqoji Kadrların
İxtisasartırma və Yenidənhazırlanma İnstitutunda
Azərbaycan Respublikası Təhsil Şurası və BPKİYİ-nin
birgə təşkilatçılığı ilə "Azərbaycan
Respublikasında ümumi təhsilin inkişaf
perspektivləri" mövzusunda elmi-praktik
konfrans keçirildi. Konfransda Təhsil Şurası
İdarə Heyətinin üzvləri, BPKİYİ-nin əməkdaşları,
məktəb rəhbərləri iştirak edirdilər.
Konfransı giriş sözü ilə açan BPKİYİ-nin rektoru,
fizika-riyaziyyat elmləri doktoru, professor
Asəf Zamanov iştirakçıları salamlayaraq elmi-praktik
konfransın Azərbaycan Respublikasının dövlət
müstəqilliyinin bərpasının 20 illiyi münasibəti
ilə keçirildiyini bildirdi və onun gündəliyi, iş
qaydası haqqında məlumat verdi.
Gündəliyə uyğun olaraq əvvəlcə konfrans
çərçivəsində Azərbaycan Respublikası Təhsil
Şurası İdarə Heyətinin iclası keçirildi. Təhsil
Şurasının sədri, pedaqoji elmlər doktoru,
professor Əjdər Ağayev şuranın genişləndirilmiş
iclasına qatılanlara təşəkkürünü bildirərək
İdarə Heyətinin üzvlərini konfrans
iştirakçılarına təqdim etdi. Onun təklifi ilə
İdarə Heyətinin son iclasından ötən müddət
ərzində dünyasını dəyişmiş heyət üzvlərinin
xatirəsi bir dəqiqəlik sükutla yad olundu.
Sonra professor Ə.Ağayev rəhbərlik etdiyi qeyri-hökumət
təşkilatının son ikiillik fəaliyyəti haqqında
hesabat verdi. Öncə Təhsil Şurasının yaranma
tarixindən söz açan Ə.Ağayev onun 1998-ci ildə
Azərbaycan müəllimlərinin XI qurultayında
ümummilli lider Heydər Əliyevin təşəbbüsü ilə
təsis olunduğunu, bir ictimai qurum kimi əsas
fəaliyyətinin təhsildəki problemlərin həlli ilə
bağlı hökumət təşkilatlarına, digər müvafiq
qurumlara və rəsmi şəxslərə təkliflər vermək
olduğunu bildirdi. Ə.Ağayev diqqətə çatdırdı ki,
belə təkliflər vermək üçün Təhsil Şurası
müntəzəm olaraq təhsilin müxtəlif məsələlərinə
həsr olunmuş elmi-praktik konfranslar,
seminarlar, pedaqoji kollektivlərlə görüşlər
keçirir, təhsildəki problemləri, təhsil
işçilərini düşündürən məsələləri araşdırır,
irəli sürülən təklifləri ümumiləşdirir və
müvafiq orqanlara çatdırır. Şura sədri son iki
ildə orta məktəblərdə musiqi fənninin tədrisi,
qiymətləndirmə, pedaqoji kadr hazırlığı,
Boloniya prosesinə inteqrasiya, təlimə innovativ
yanaşmalar və s. mövzulara həsr olunmuş elmi-praktik
konfransların, bir sıra təhsil ocaqlarında, o
cümlədən Naxçıvan Dövlət Universitetində,
Naxçıvan Müəllimlər İnstitutunda görüşlər
keçirildiyini bildirdi, şuranın mətbu orqanı
olan "Təhsil və zaman" qəzetinin uğurlu
fəaliyyətindən söz açdı.
Təhsil Şurasının fəaliyyət istiqamətlərindən
birinin də qabaqcıl təhsil işçilərini
rəğbətləndirmək təşkil etdiyini söyləyən
Ə.Ağayev Bakıdakı 177 nömrəli orta məktəbin
direktoru, tanınmış təhsil işçisi Həqiqə
Məmmədovaya Təhsil Şurası İdarə Heyətinin qərarı
ilə "Ustad müəllim" diplomu verildiyini, bu
günlərdə isə Təhsil Problemləri İnstitutu
Kurikulum Mərkəzinin direktoru, pedaqogika üzrə
fəlsəfə doktoru, dosent Ənvər Abbasovun təhsilin
modernləşdirilməsi sahəsindəki xidmətlərinə görə
və anadan olmasının 60 illiyi ilə əlaqədar
"Nəsirəddin Tusi" mükafatına layiq görüldüyünü
bildirdi və mükafatı Ə.Abbasova təqdim etdi.
Sonra elmi-praktik konfrans öz işinə başladı.
Konfransda giriş sözü söyləyən Bakı Pedaqoji
Kadrların İxtisasartırma və Yenidənhazırlanma
İnstitutunun rektoru, professor A.Zamanov onun
mövzusunun "Azərbaycan Respublikasında ümumi
təhsilin inkişaf perspektivləri" kimi
müəyyənləşdirilməsinin təsadüfi olmayıb bu
barədə Təhsil Şurası, institutun
professor-müəllim heyətinin üzvləri ilə
məsləhətləşmələr aparıldıqdan sonra qərara
gəlindiyini, tarixin bütün dönəmlərində olduğu
kimi bu gün də təhsilin çox aktual olduğunu
bildirdi.
Məşhur alimlərdən birinin apardığı təsnifata
görə, sivilizasiyanın inkişafının bir neçə dövrə
bölündüyünü, həmin dövrlərdən sonuncunun ən
böyük var-dövlətinin məhz intellektual kapital
olduğunu, müasir dövrdə ölkələrin, dövlətlərin
inkişafında intellektual kapitalın mühüm rol
oynadığını, məhz buna görə də son illər
ölkəmizdə möhtərəm Prezidentimiz İlham Əliyevin
rəhbərliyi altında neft kapitalının insan
kapitalına, intellektual kapitala çevrilməsi
istiqamətində mühüm işlər görüldüyünü diqqətə
çatdırdı.
Rektor Azərbaycanın intellektual potensialının
formalaşmasında ulu öndər Heydər Əliyevin
xidmətlərini xüsusi qeyd edib məhz onun
Azərbaycana rəhbərlik etməyə başladığı 1969-cu
ildən sonra bu istiqamətdə ciddi addımlar
atıldığını, hər il ölkəmizdə xeyli gəncin təhsil
almaq üçün keçmiş Sovetlər birliyinin ən nüfuzlu
ali məktəblərinə göndərildiyini, həmin siyasətin
bu gün də uğurla davam etdirildiyini, Azərbaycan
Prezidenti İlham Əliyevin sərəncamı ilə təsdiq
edilmiş "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı"na əsasən 5 minədək azərbaycanlı gəncin
dünyanın ən nüfuzlu universitetlərinə
göndərilməsinin nəzərdə tutulduğunu və bu
prosesin bu gün çox uğurla getdiyini vurğuladı.
A.Zamanov çıxışında Azərbaycanda təhsilin
maddi-texniki bazasının möhkəmləndirilməsi,
informasiya təminatının yaradılması, təhsilin
məzmununun yeniləşdirilməsi, təhsilimizin dünya
təhsil məkanına inteqrasiyası istiqamətində
mühüm işlər görüldüyünü söyləyərək bütün
bunların son nəticədə ölkəmizdə intellektual
potensialın inkişafına xidmət etdiyini bildirdi.
Sonra professor A.Zamanov ölkəmizin dövlət
müstəqilliyinin bərpasından keçən 20 il ərzində
görülmüş işlərə qısa ekskurs edərək, təhsil
sahəsində əldə olunmuş bəzi uğurları diqqətə
çatdırdı.
Çıxışının sonunda rektor Təhsil Şurasının
rəhbərlik etdiyi institutla sıx əməkdaşlığına
görə bu qurumun rəhbəri Əjdər Ağayevə təşəkkür
etdi, Şuranın mükafatını almış Ənvər Abbasovu
təbrik etdi.
Elmi-praktik konfransda Təhsil Şurasının sədri,
professor Əjdər Ağayevin "Azərbaycan
Respublikasında ümumi təhsilin modern inkişafı"
mövzusunda məruzəsi dinlənildi. Məruzəçi
müstəqilliyimizin 20 ili ərzində təhsilin
modernləşdirilməsi istiqamətində aparılan
işlərin bir neçə mərhələdən keçdiyini,
1991-1993, 1993-1998, 1998-2003 və 2003-cü ildən
bü günədək olan dövrlərə böldüyü həmin
mərhələlərin hər birində görülmüş işlər, əldə
olunan uğurlar barədə geniş məlumat verdi.
Sonra məruzə ətrafında çıxışlar oldu. İlk söz
alan Azərbaycan Təhsil İşçiləri Azad Həmkarlar
İttifaqı Respublika Komitəsinin sədr müavini,
Təhsil Şurası İdarə Heyətinin üzvü Şaiq Əsgərov
ölkəmizdə təhsilin inkişafı, onun maddi-texniki
bazasının möhkəmləndirilməsi, təlim-tərbiyə
işinin təşkili, xüsusən də təhsilin
normativ-hüquqi bazasının hazırlanması
sahələrində son illər böyük işlər görüldüyünü,
irimiqyaslı layihələr həyata keçirildiyini,
möhtərəm Prezidentimiz İlham Əliyevin, Heydər
Əliyev Fondunun prezidenti, millət vəkili,
YUNESKO və İSESKO-nun xoşməramlı səfiri Mehriban
xanım Əliyevanın təhsil sahəsinə böyük diqqət və
qayğı göstərdiklərini bildirdi. Ş.Əsgərov
çıxışında ATİAHİ Respublika Komitəsinin Təhsil
Nazirliyi, Bakı Şəhəri üzrə Təhsil İdarəsi,
BPKİYİ ilə birlikdə həyata keçirdiyi çoxsaylı
tədbirlərdən, layihələrdən də bəhs edib,
komitənin bütün bu tədbirlərdə bərabər tərəfdaş
kimi iştirak etdiyini söylədi, keçirilən belə
birgə layihələrin bəzilərini diqqətə çatdırdı.
Tədbirdə Təhsil Problemləri İnstitutunun
direktor müavini, Kurikulum Mərkəzinin direktoru
Ənvər Abbasov, Bakıdakı 177 nömrəli orta
məktəbin direktoru, respublikanın əməkdar
müəllimi Həqiqə Məmmədova da çıxış edib mövzu
ilə bağlı öz fikirlərini bildirdilər, bəzi
təkliflər irəli sürdülər. Ə.Abbasov layiq
görüldüyü mükafata görə Təhsil Şurasının sədri,
professor Ə.Ağayevə minnətdarlığını ifadə etdi.
Yusif ƏLİYEV |
|
