Bu günlərdə Bakı Atatürk liseyinin pedaqoji
kollektivi, şagirdlər və valideynlər Abşeronun
Qala kəndində ekskursiyada olublar. Ekskursiya
Azərbaycan Tələbə Gənclər Təşkilatlar İttifaqı
və Enerji Resurslarından İstifadə üzrə
Beynəlxalq məktəbli layihəsi (SPARE)
çərçivəsində təşkil olunub.
Arxeoloji Etnoqrafik Muzey Kompleksinə
ekskursiyada uşaqlar ibtidai insanların
məişət və təsərrüfatlarında ilk enerji mənbəyi
olan odun əldə olunması, onun saxlanılması və
istifadə edilməsi, canlı və cansız təbiətin
qarşılıqlı münasibətləri haqqında, o cümlədən
qədim dövrlərdən müasir zamanımıza kimi enerji
resurslarının mənbələrinin dəyişməsi barəsində
biliklər əldə ediblər. Onlar ən qədim tarixə
səyahət edərək, muzey kompleksindəki Qala qəsri,
ibtidai insanların yaşayış məskənləri, qədim
özüllər, ibtidai divar qalığı, qayaüstü
rəsmlər, qavaldaşı, keramika, məişət və bəzək
əşyaları, silah və müxtəlif emalatxanalarla
tanış olublar. Ekskursiya zamanı şagirdlər üçün
ustad dərsləri də təşkil olunub.
S.SƏFƏROVA |
|