|
2011-ci ilin dekabr ayında Azərbaycanın görkəmli
tarixçisi və şərqşünas alimi, tanınmış ictimai
xadim, tarix elmləri doktoru, professor, Dövlət
mükafatı laureatı, Sovet İttifaqı Qəhrəmanı,
akademik Ziya Musa oğlu Bünyadovun anadan
olmasının 90 ili tamam olur.
Zəngin və çoxşaxəli yaradıcılığı sayəsində Ziya
Bünyadov respublikamızda tarix elminin yeni
mərhələyə yüksəldilməsi işinə layiqli töhfələr
vermişdir. Azərbaycan tarixinin müxtəlif
dövrlərinə dair uzun illər ərzində meydana
gətirdiyi fundamental tədqiqatlar, eləcə də orta
əsrlərə aid çox sayda mənbələrin tərcüməsi ilə
yanaşı, onlara yazdığı geniş şərhlər alimə böyük
şöhrət qazandırmışdır. Azərbaycanda yeni
ərəbşünas tarixçilər nəslinin formalaşmasında
onun fəaliyyəti təqdirəlayiqdir.
Azərbaycan Respublikası Konstitusiyasının
109-cu maddəsinin 32-ci bəndini rəhbər tutaraq
ölkəmizdə tarix elminin inkişafı sahəsində
müstəsna xidmətlər göstərmiş akademik Ziya
Bünyadovun 90 illik yubileyinin keçirilməsini
təmin etmək məqsədilə
QƏRARA ALIRAM:
1. Azərbaycan Milli Elmlər Akademiyası
Azərbaycan Respublikasının Təhsil Nazirliyi ilə
birlikdə akademik Ziya Bünyadovun 90 illik
yubileyinə həsr olunmuş tədbirlər planını
hazırlayıb həyata keçirsin.
2. Azərbaycan Respublikasının Nazirlər Kabineti
bu sərəncamdan irəli gələn məsələləri həll etsin.
İlham ƏLİYEV,
Azərbaycan Respublikasının Prezidenti
Bakı şəhəri, 24 noyabr 2011-ci il |
