|
 AMEA
İnformasiya Texnologiyaları İnstitutunda
informatika fənni üzrə respublika ümumtəhsil
məktəblərinin V-IX sinifləri üçün "Qiymətləndirmə
standartlarının təkmilləşdirilməsi"nə dair fənn
müəllimləri üçün müvafiq təlimatların
hazırlanmasını təmin etmək məqsədilə təhsil
naziri tərəfindən yaradılmış işçi qrupunun
növbəti iclası keçirildi. İclasda informatika
fənni üzrə V sinif üçün qiymətləndirmə
standartlarının təkmilləşdirilməsi istiqamətində
aparılan işlər haqqında məlumat verildi.
İnstitutun direktoru, AMEA-nın müxbir üzvü,
professor Rasim Əliquliyev informatika üzrə
təhsil standartlarının təkmilləşdirilməsi, bu
sahədə beynəlxalq təcrübənin, xüsusən də YUNESKO-nun
tövsiyə etdiyi standartların öyrənilməsi və
tətbiqi məsələlərinin önəmliliyini vurğuladı.
Alim XXI əsrin innovativ təfəkkürə malik
müəllimlərində müasir informasiya və digər
elmtutumlu mütərəqqi texnologiyalardan istifadə
etməklə informasiya-texnoloji mədəniyyətin
formalaşmasının mühüm amil olduğunu bildirdi. Bu
mədəniyyətin müəllimlərin peşəkar pedaqoji
hazırlığı prosesində özünü daha effektiv büruzə
verməsinə, onların peşəkar fəaliyyətində
yaradıcılıq potensialını reallaşdırmağa imkan
verdiyini söylədi. Təkcə müəllimlərdə deyil, həm
də gənc kadrlarda informasiya-texnoloji bilik və
bacarıqların, təfəkkür və dünyagörüşünün
formalaşmasının mühüm şərtlərdən olduğunu qeyd
etdi.
 Təhsil
Nazirliyinin Təhsilin idarəolunmasının məlumat
sistemləri şöbəsinin müdiri İsmayıl Sadıqov
şagirdlərin bilik və bacarığının aşkarlanması,
xüsusən də şagird nailiyyətlərinin
qiymətləndirilməsi üçün innovativ təhsil
standartlarının təkmilləşdirilməsinin bu gün
təhsil sisteminin qarşısına qoyulmuş başlıca
hədəflərdən olduğunu bildirdi. Şöbə müdiri
informatika fənni üzrə V sinif üçün təyin
olunmuş qiymətləndirmə standartlarının
təkmilləşdirilməsi istiqamətində işçi qrupu
tərəfindən aparılmış işlər haqqında məlumat
verdi.
V sinif dərsliyində "İnformasiya və informasiya
prosesləri", "Formallaşdırma, modelləşdirmə,
alqoritmləşdirmə və proqramlaşdırma", "Cəmiyyətin
informasiyalaşdırılması" bölmələri üzrə təhsil
standartlarında edilmiş dəyişikliklər müzakirə
olundu, fikir və tövsiyələr səsləndirildi. Yekun
olaraq təkmilləşdirilmiş təhsil standartlarının
Təhsil Nazirliyinə təqdim olunmasına dair qərar
verildi. |
