|
 Bakı
Slavyan Universiteti 13 iyul 2000-ci ildə
ümummilli liderimiz Heydər Əliyevin fərmanı ilə
yaradılmışdır. Yaradılan ildən BSU-nun rektoru,
AMEA-nın müxbir üzvü, professor Kamal
Abdullayevin təşəbbüsü və təşkilatçılığı ilə bir
çox maraqlı layihələr həyata keçirilmişdir. Bu
layihələrdən biri də universitetdə təhsil alan,
müxtəlif ixtisaslar üzrə peşəkar mütəxəssis
olmağa hazırlaşan tələbələrin tələbə
özünüidarəçiliyinə, yəni "Bir günlük xəlifə"
gününə cəlb olunmasıdır.
Bakı Slavyan Universiteti tələbələrinin müstəqil
idarəçilik qabiliyyətinin inkişafına təkan
vermək, intellektual səviyyələrini, işgüzar
bacarıq və vərdişlərini yoxlamaq, onlar
tərəfindən verilən uğurlu təklifləri təhlil edib
həyata keçirmək məqsədilə bu maraqlı layihə
ilk dəfə 2002-ci il dekabrın 13-də gerçəkləşmiş
və həmin gün 14 rəhbər vəzifəyə tələbələrin
namizədliyi irəli sürülmüşdür. Obyektivliyi və
şəffaflığı təmin etmək məqsədilə seçkilər
tamamilə tələbələrin öhdəsinə buraxılmış və heç
bir rəhbər şəxsin müdaxiləsi olmamışdır. Növbəti
"Xəlifə" günləri 2005-ci il 13 may, 2007-ci il
13 aprel, 2009-cu il 13 noyabr tarixlərində
həyata keçirilmiş və həmin günlər tələbələrin
yaddaşında unudulmaz xatirəyə çevrilmişdir.
Builki "Bir günlük xəlifə" özünüidarəetmə günü
2011-ci il 13 dekabr tarixinə təsadüf etdi.
Sentyabr ayından etibarən başlanılan hazırlıqlar
artıq başa çatmışdır. Rektorun əmri ilə
seçkilərin keçirilmə vaxtı müəyyənləşdirilmiş və
"Xəlifə" gününün keçirilməsində bütün
təşkilatçılıq keçmiş "xəlifə"lərdən təşkil
olunmuş münsiflər heyəti, Kölgə Kabineti və
Tələbə Gənclər Təşkilatına tapşırılmışdır.
Tələbələr onlara verilən xüsusi blanka özləri
haqqında məlumatı və namizədlik verdikləri
vəzifələr haqqında bildiklərini yazmışlar. Buna
uyğun olaraq tələbələrin reytinq cədvəli, yəni
onların tələbələr arasında nüfuz dərəcəsi
müəyyənləşdirilmişdir. Universitetin akt zalında
400-dən çox tələbənin iştirakı ilə seçkilər
keçirilmiş və namizədlər müəyyən olunmuşdur.
Qeyd etmək lazımdır ki, budəfəki "Xəlifə"
günündə 21 vəzifəyə 153 nəfər tələbə
namizədliyini irəli sürmüşdür. Sonra onlar öz
aralarında debatlar keçirmiş, platformalarını
təqdim etmişlər. Ən maraqlı təklif və ən dolğun
platforma ilə çıxış edən 21 tələbə rəhbər icraçı
vəzifəsinə seçilmişdir.
Təşkil olunmuş mətbuat konfransında digər "xəlifə"lərlə
birlikdə jurnalistləri maraqlandıran suallara
cavab verən builki "xəlifə"-rektor BSU-nun
jurnalistika və Azərbaycan filologiyası
fakültəsinin tələbəsi Murad Abitov bildirdi: "Bu
gün tələbələr daha məsuliyyətli və diqqətli
olmalıdırlar. Bu yaşda BSU kimi böyük bir təhsil
ocağına rəhbərlik etmək nə qədər şərəfli olsa da,
həm də olduqca böyük məsuliyyət tələb edir.
Sözügedən layihə bizə bunu daha dərindən, əyani
şəkildə dərk etməyə imkan verir. Xəlifəlik
dövründə biz həmçinin platformamızda təklif
etdiyimiz ideyaları gerçəkləşdirə bilərik və
əsas məqsədimiz də elə bundan ibarətdir".
Universitetin tədris işləri, elmi işlər,
beynəlxalq əlaqələr, tərbiyə işləri və inzibati
işlər üzrə "prorektorları" Əli İsmayılov, Ceyhun
Talıbov, Vüsal Əliyev, Nərgiz Kərimova və Elvin
Sadıqov bildirdilər ki, məhz bu layihənin
Azərbaycanda ilk dəfə olaraq BSU-da həyata
keçirilməsi, tələbələrə göstərilən etimad
universitetimizi digər universitetlərdən
fərqləndirir və tələbələrin özünüidarəçilik
qabiliyyətlərinin formalaşmasında mühüm rol
oynayır. Gənclər onu da qeyd etdilər ki, biz bu
etimadı doğruldacağıq və öz vəzifələrimizin
öhdəsindən layiqincə gələcəyik. Qeyd etmək
lazımdır ki, onlar iş gününə başlamazdan əvvəl
ümummilli lider Heydər Əliyevin Fəxri xiyabanda
məzarını ziyarət etmiş və ölməz rəhbərimizin
BSU-da yerləşən büstü önünə əklillər qoymuşlar.
"Xəlifə" günü Ukrayna Respublikasının
Azərbaycandakı fövqəladə və səlahiyyətli səfiri
Aleksandr Pavloviç Mişşenko universitetdə yüksək
səviyyədə təşkil olunmuş Ukrayna Dili və
Mədəniyyəti Mərkəzində tələbələrlə görüşdü.
Görüşdə çıxış edən səfir bildirdi ki, "Ukrayna
ilə Azərbaycan arasında bütün sahələr üzrə
əlaqələr yüksək səviyyədə inkişaf edir".
A.Mişşenko onu da qeyd etdi ki,
Ukrayna-Azərbaycan əlaqələrinin qurulmasında BSU
xüsusi çəkiyə malikdir. "BSU həmişə məni maraqlı
və mənalı layihələri ilə təəccübləndirib.
Tələbələrinizə yaratdığınız şərait, onlara
demokratik dəyərlərə söykənərək göstərdiyiniz
etimad diqqətəlayiqdir. İnanıram ki, bu gün
inamlı addım atan, müstəqil qərar qəbul etmək
bacarığına malik olan bu xəlifələr gələcək
işlərində də çətinliklərin öhdəsindən asanlıqla
gələcəklər". Görüşün sonunda səfir tələbələrin
suallarını cavablandırdı və xəlifələrlə xatirə
şəkli çəkdirdi.
"Xəlifə" günü çərçivəsində bir sıra maraqlı
görüşlər də baş tutmuşdur. Yeni Azərbaycan
Partiyası Nəsimi rayon təşkilatının əməkdaşları,
"İrəli" İctimai Birliyi və "AGAT" (Azərbaycan
Gənclərinin Avropaya İnteqrasiyası Mərkəzi)
təşkilatının nümayəndələri ilə görüş tələbələrin
xüsusi marağına səbəb olmuşdur. Ötən gün eyni
zamanda yazıçı Mövlud Süleymanlı ilə tərcümənin
müasir problemləri müzakirə olunub və professor
Rəhilə Qeybullayeva ilə "Arxitip, adaptasiya və
plagiat" mövzusunda "dəyirmi masa" keçirilib.
Layihə çərçivəsində həmçinin ilahiyyatçı Hacı
Şahinlə keçirilən görüşdə müasir dövrdə düzgün
dərk edilməyən dini anlayışlara açıqlıq
gətirilib. Universitetin akt zalında isə TGT
tərəfindən hazırlanmış BSU himninin təqdimat
mərasimi də keçirilmişdir. Qeyd edək ki,
universitetin foyesində pedaqoji fakültə
tələbələrinin əl işlərindən ibarət sərgi
hazırlanmış və tələbələrin yaradıcılığı nümayiş
etdirilmişdir.
Universitetin II tədris binasında da "Xəlifə
günü" maraqlı görüşlərlə yadda qalıb. Belə ki,
Almaniya Federativ Respublikasının
Azərbaycandakı səfirliyinin I katibi Floran
Potter filologiya fakültəsinin "dekanı" ilə
görüşmüş, sonra isə almanşünas tələbələrə "İmmiqrasiya
problemləri" mövzusunda mühazirə oxumuşdur.
Universitetin "Bir günlük xəlifə" günü rəhbər
vəzifələri icra etmiş tələbələrə Moskva Dövlət
Linqvistik Universitetində (Rusiya), Minsk
Dövlət Pedaqoji Universitetində (Belarus),
Poltava İqtisadiyyat və Ticarət Universitetində
(Ukrayna) fəaliyyət göstərən Azərbaycanşünaslıq
Tədris-Mədəniyyət mərkəzləri, Kiyev Milli
Linqvistik Universitetinin TGT-si, Azərbaycan
Tələbə Gənclər Təşkilatları İttifaqı, Qırmızı
Aypara Cəmiyyəti və digər nüfuzlu müəssisə və
təşkilatlar tərəfindən təbrik məktubları daxil
olmuş və onlara göstərilən yüksək etimadı
doğruldacaqlarına əminlik vurğulanmışdır.
Tələbələr "xəlifəlik" etdikləri bir gün ərzində
BSU-da həmişəki iş rejimi gözlənilmiş və rəhbər
vəzifələri icra edən 21 tələbə gün ərzində öz
vəzifələrini məharətlə yerinə yetirməyə
çalışmışlar. BSU-da keçirilən layihələrin ən
maraqlı və vaciblərindən biri olan "Xəlifə" günü
universitetdə gənclərə nə cür etimad
göstərilməsindən xəbər verir.
Şakir CƏFƏROV |
