Dekabrın
14-də Bakının Nəsimi rayonundakı 9 nömrəli tam
orta məktəbdə "Riyaziyyat aylığı" çərçivəsində
"Riyaziyyat elmlərin şahı, hesab isə
riyaziyyatın tacıdır" adlı riyaziyyat gecəsi
keçirildi.
Tədbir iştirakçıları əvvəlcə məktəbin foyesində
təşkil olunan şagirdlərin əl işlərindən ibarət
sərgi ilə tanış oldular. Şagirdlər
hazırladıqları bacarıqlı riyazi füqurlarla və
əmək dərsində öyrəndikləri işlərlə
iştirakçıların diqqətini cəlb etdilər. Sonra
məktəbin idmanla məşğul olan şagirdləri riyazi
füqurlarla gimnastik hərəkətlər göstərdilər.
Qonaqlar riyaziyyat fənni üzrə IV sinifdə
N.Abdalovanın, V sinifdə M.Rəcəbovanın və
G.Əliyevanın "açıq dərs"lərində iştirak etdilər.
Daha sonra proqrama uyğun olaraq riyaziyyat
gecəsinə həsr edilmiş musiqili tədbir keçirildi.
Qonaqları təqdim edən təhsil ocağının direktoru
Zinyət Əhmədova bildirdi ki, riyaziyyat fənni
məntiqi təfəkkürün formalaşmasında, mühakimə və
dərketmə qabiliyyətinin yüksəlməsində müstəsna
rol oynayır. Orta məktəb şagirdlərinin ən çox
sevdikləri fənlərdən biri riyaziyyatdır.
Riyaziyyatda istifadə olunan riyazi dil
şagirdlərdə dəqiqlik, nitqdə daha münasib olan
vasitələri seçməklə fikri dolğun ifadə etmək
bacarığını inkişaf etdirir. Qeyd olundu ki, bu
fənn zehni inkişafın əvəzedilməz bir vasitəsidir.
Şagirdlər riyaziyyat fənninə aid şeirlərlə,
mahnılarla həmin günü yaddaqalan etdilər.
Tədbirdə iştirak edən məktəb direktorları,
riyaziyyat müəllimləri və digər qonaqlar gecənin
yüksək səviyyədə keçirilməsinə görə məktəb
kollektivinə təşəkkürlərini bildirdilər. "Açıq
dərs"lər qonaqlar tərəfindən müzakirə edildi.
Müəllimlərin işi yüksək qiymətləndirildi.
Rəşad ZİYADOV |