|
 60
yaşa bəzən belə deyirlər. Dostum, həmkarım, 90-cı
illərin əvvəllərindən 10 il müddətində Təhsil
Nazirliyində bir yerdə işlədiyim, adının
mənasını çox erkən yaşlarından ziyalılığı,
çalışdığı vəzifələrdə qüsursuz fəaliyyəti ilə
doğruldan, yaxşı müəllim və nümunəvi məmur kimi
təhsil ictimaiyyəti arasında, Təhsil
Nazirliyində özünə hörmət və nüfuz qazanmış
Kamil Məcidov artıq bu mənzilə çatıb. Biz onunla
həmyaşıdıq. Adam bəzən ömrünün necə keçdiyini,
artıq yaşa dolduğunu hiss etmir. Əslində Kamil
müəllimin yaşının 60-a çatmasını göstərən təkcə
saçlarının ağlığıdır. Qalan hər şey - sevib-seçdiyi
müəllimlik sənətinə məhəbbəti, həvəsi də, öz
vəzifəsinə, ona tapşırılan bütün işlərə böyük
məsuliyyətlə yanaşması da, həyat enerjisi,
işgüzarlığı da elə 20 il bundan əvvəl nazirlikdə
birgə iş prosesində gördüyüm kimidir. Üstəlik
peşəkarlığı, həyat təcrübəsi qat-qat artıb,
kamilliyə qovuşub.
Kamil müəllim işinin çoxluğundan, vaxtının
azlığından heç vaxt gileylənməyən, ən çətin,
gərgin anlarında belə müvazinətini saxlayan,
əhatəsində olan bütün insanlarla səmimi, isti
münasibət qurmağı bacaran, hər hansı bir məsələ
barədə məsləhət, kömək almaq üçün müraciət edən
hər kəsə bacardığı köməyi əsirgəməyən
insanlardandır. Mənim qənaətimə görə, bu
xüsusiyyətlərinin, daşıdığı yüksək mənəvi
keyfiyyətlərin əksəriyyətini o, mənsub olduğu
soydan irsən alıb. Bir qismini isə 20 ildən bəri
çalışdığı Təhsil Nazirliyi aparatında, buradakı
səmimi, işgüzar mühitdə, habelə oxuyub
öyrəndiklərindən, görüb-götürdüklərindən əxz
edib.
Kamil Məcidov 1951-ci il avqustun 17-də Kürdəmir
rayonunun Qağacılı kəndində, hamının həmişə
hörmət edib ehtiram bəslədiyi Məcid müəllimin
ailəsində dünyaya göz açıb.
Atası - respublikanın əməkdar müəllimi Məcid
Məcidov sayılıb-seçilən maarif xadimlərindən idi.
İkinci Dünya müharibəsində Qafqazdan Berlinədək
döyüş yolu keçmişdi. Uzun illər rayonda rəhbər
vəzifələrdə işləmiş, 1953-cü ildən başlayaraq 30
il Kürdəmir təhsilinə başçılıq etmişdi.
Xalq təhsilinin və maarifin inkişafında
göstərdiyi xidmətlərin müqabilində "Əməkdar
müəllim" fəxri adına, SSRİ-nin və Azərbaycanın "Əlaçı
maarif işçisi" döş nişanlarına layiq görülmüş, 2
dəfə "Şərəf nişanı" ordeni ilə təltif olunmuşdu.
Kamilin nənəsi Saray xanım körpə hələ dünyaya
gəlməmişdən "oğlan olsa, ona babası Kamilin
adını qoyacam..."- deyirmiş.
Nənənin arzusu həyata keçir.
...Kamil hələ uşaq yaşlarından öz sakitliyi,
ciddiliyi, səmimiliyi, diqqətcilliyi, böyüklərə
hörmətlə yanaşması ilə yaşıdlarından fərqlənirdi.
1958-ci il sentyabrın 1-də Kürdəmir rayonundakı
Yenikənd kənd orta məktəbinin birinci sinfinə
qəbul olunan Kamil məktəbdə oxuduğu illərdə
bütün fənlərə eyni dərəcədə maraq göstərmiş,
onlara fərq qoymamışdır. Bütün fənlərdən həmişə
"əla" qiymətlər almışdır. Yuxarı siniflərdə
oxuyarkən kimya, riyaziyyat, fizika fənləri üzrə
respublika olimpiadalarında iştirak edib.
Hələ məktəbli olarkən ədəbiyyata, şeirə, sənətə
böyük maraq göstərən Kamil məktəb dram
dərnəyinin ən fəal üzvlərindən olub, ara-sıra
şeirlər yazıb. Özünün dediyi kimi, bu sahədə ona
hazırda AMEA-da çalışan tanınmış alim Zirəddin
Xacıyevin, mərhum dil-ədəbiyyat müəllimləri
Vahir Məmmədovun, Əbil Həsənovun böyük təsiri
olub.
İllər qanadlı quş kimi ötüb keçdi. 1968-ci ildə
qayğılı-qayğısız məktəb illəri başa çatdı.
Kamil buraxılış imtahanlarından "əla" qiymətlər
alaraq orta məktəbi qızıl medalla bitirdi. Onun
gələcək həyat yolunu hər kəs bir cür görürdü.
Rəhmətlik anası Rəfiqə xanım oğlu Kamilin həkim
olmasını istəyirdi. Yoldaşları Kamilin
hüquqşünas, müəllimləri isə mühəndis peşəsini
seçəcəyini güman edirdilər. Atası Məcid müəllim
isə bir söz demirdi. Qoy özü qərara gəlsin -
deyə düşünürdü.
Kamil isə tərəddüdsüz-filansız müəllimliyi seçdi.
Ona görə ki, müəllimlik peşəsini ta uşaq
yaşlarından yüksək qiymətləndirirdi. Beləliklə,
Kamil Məcidov 1968-ci ildə keçmiş V.İ.Lenin
adına Azərbaycan Dövlət Pedaqoji İnstitutunun (indiki
ADPU) riyaziyyat fakültəsinə daxil oldu. Təhsil
illərində o, riyaziyyatı, pedaqogikanı,
psixologiyanı və metodikanı dərindən öyrənməklə
müəllimliyin sirlərinə yiyələndi. Özünün
dediyinə görə, təhsil illərində onun müəllimlik
peşəsinə hazırlanmasında sevimli və unudulmaz
müəllimləri Əhməd Əhmədovun, Bəxtiyar
Abdullayevin, Şəmistan Məmmədovun, Qardaşxan
Qasımovun, Qardaşxan Orucovun, Yusif Salmanovun,
Firidun Abdullayevin, Əhməd Kərimovun, Azadxan
Adıgözəlovun, Zemfira Tağıyevanın və
başqalarının böyük zəhməti olmuşdur.
Kamil Məcidov 1972-ci ildə ali təhsilini başa
vurduqdan sonra təyinatla Kürdəmir rayonuna
getmiş, Köhnəbazar kənd orta məktəbində
riyaziyyat müəllimi kimi ilk əmək fəaliyyəttinə
başlamış və qısa müddət ərzində müəllim və
şagirdlərin sevimlisinə çevrilmişdir.
Kamil müəllimin həmin məktəbdə vaxtaşırı
keçirdiyi "riyaziyyat gecələri" pedaqoji və
şagird kollektivinin, eləcə də valideynlərin və
kənd sakinlərinin yaddaşında dərin iz
buraxmışdır.
Kamil müəllim öz ailə taleyindən çox razıdır. O,
1973-cü ildə keçmiş sinif yoldaşı Lətifə xanımla
ailə qurmuşdur. Söz düşəndə Kamil müəllim həmişə
deyir: Lətifə xanım təkcə mənə həyat yoldaşı yox,
həm də çətin anlarımın sirdaşı və yolgöstərəni
olub...
Kamil müəllim Köhnəbazar kənd orta məktəbində üç
il (1972-1975-ci illərdə) riyaziyyat müəllimi
işləmiş, 1975-ci ilin iyununda müsabiqə yolu ilə
Azərbaycan Dövlət Pedaqoji İnstitutunda Ümumi
pedaqogika kafedrasının nəzdində yaradılmış "Şagirdlərin
peşəyönümü" problem laboratoriyasında kiçik elmi
işçi vəzifəsinə seçilmişdir.
1977-ci ildə Moskva ətrafındakı hərbi hissədə
xidmət etmiş K.Məcidov, nümunəvi xidmətinə görə
hərbi hissənin fəxri fərmanlarını almışdır.
Hərbi xidmətini başa vurduqdan sonra Bakıya
qayıtmış və yenidən Azərbaycan Dövlət Pedaqoji
İnstitutunun "Şagirdlərin peşəyönümü" problem
laboratoriyasında öz işini davam etdirmişdir.
1988-ci ilə kimi həmin laboratoriyanın əməkdaşı
olan K.Məcidov bu illər ərzində ümumtəhsil və
texniki peşə məktəblərində öyrədilən bəzi fənlər
üzrə proqram və dərsliklərin peşəyönümü işi üçün
imkanlarını aşkara çıxarmış, şagirdlərin peşəyə
istiqamətləndirilməsinin yollarını
müəyyənləşdirmiş, texniki peşə məktəblərində və
məktəblərarası tədris-istehsalat kombinatlarında
aparılan peşəyönümü işlərinin məzmununu, forma
və yollarını işləyib hazırlamışdır.
1983-1992-ci illərdə Kamil Məcidov respublika
televiziyasında "Peşə, sənət yollarında" və "İstədiyiniz
ixtisası seçin" verilişlərinin aparıcısı
olmuşdur. Bu illərdə 150-yə yaxın veriliş
hazırlamış və tamaşaçılara çatdırmışdır.
Şagirdlərin və məzunların peşələrlə tanış
edilməsində və peşə seçməsində, peşəyönümü
sahəsində aparılan tədqiqatların nəticələrinin
tətbiqində, ümumtəhsil və texniki peşə
məktəblərində qabaqcıl təcrübənin öyrənilib
yayılmasında, məktəblilərin və abituriyentlərin
ali və orta ixtisas təhsili müəssisələri və
orada kadr hazırlığı aparılan ixtisaslarla tanış
edilməsində həmin verilişlərin böyük rolu
olmuşdur.
Kamil Məcidov 1980-ci ildən Azərbaycan Dövlət
Pedaqoji Universitetinin ümumi pedaqogika
kafedrasının dissertantı olmuş, Rusiya Pedaqoji
Elmlər Akademiyasının həqiqi üzvü, əməkdar ali
məktəb işçisi, pedaqoji elmlər doktoru,
professor Hüseyn Əhmədovun rəhbərliyi altında
"Məktəblərarası tədris-istehsalat
kombinatlarında şagirdlərin peşəyönümü işinin
sistemi" (nəqliyyat və rabitə sahələrində)
mövzusu üzrə tədqiqat aparmışdır.
Kamil müəllim respublika "Bilik" cəmiyyətinin
(indi "Bilik"- Maarifçilik Cəmiyyəti adlanır)
"Pedaqogika və psixologiya" bölməsinin üzvü kimi
uzun illər Bakı şəhərində və respublikanın
rayonlarında pedaqoji ictimaiyyət qarşısında
pedaqogikanın müasir problemlərinə dair
mühazirələr oxumuşdur.
1980-ci ildə "Şagirdlərin peşəyönümü" problem
laboratoriyasının və laboratoriyanın əməkdaşı
K.Məcidovun təşəbbüsü ilə Pedaqoji Universitetin
tədris planlarına "Şagirdlərin peşəyönümü", "Orta
texniki peşə məktəblərində təlim-tərbiyə işləri"
adlı xüsusi kurslar daxil edilmişdir. Bu,
pedaqoji ali məktəblərdə təhsil alan gələcək
müəllimlərin orta məktəblərdə əmək tərbiyəsi və
peşəyönümü işi aparmağa hazırlanması
istiqamətində atılmış çox mühüm bir addım idi.
K.Məcidov Ümumi pedaqogika kafedrasının dosenti,
mərhum Əhməd Əhmədovla birgə həmin fənlərin
proqram və dərs vəsaitlərini hazırlamışdır.
Bu dövrdə onun həmmüəlliflərlə birgə
"Məktəblilərin peşə seçməyə hazırlanması" (1987,
Ə.Sarıyevlə), "Şagird istehsalat briqadalarının
fəaliyyətinin pedaqoji əsasları" (1989,
M.Məmmədovla), "Texniki peşə məktəblərində
təlim-tərbiyə işləri" (1992, Ə.Əhmədovla),
"Məktəb islahatı və gənclərin peşə yönümü"
(1987, A.Hüseynovla) adlı kitabları, metodik
göstərişləri (1985, 1989) nəşr edilmiş,
universitetin "Elmi əsərlər" məcmuəsində,
"Azərbaycan məktəbi", "Gənc fəhlə" jurnallarında
məqalələri dərc olunmuşdur.
Kamil Məcidov 1988-ci ildə peşəyönümü problemi
ilə bağlı namizədlik dissertasiyası müdafiə
edərək pedaqoji elmlər namizədi (hazırda
pedaqogika üzrə fəlsəfə doktoru) alimlik
dərəcəsi almışdır. O, 45 elmi və elmi-metodik
əsərin (kitab, broşüra, proqram, metodik
göstəriş, məqalə və s.) müəllifidir. Qəzetlərdə
təhsillə bağlı 150-dən artıq məqaləsi dərc
olunmuşdur.
K.Məcidov 1988-ci ildə Bakı Politologiya
İnstitutunda (hazırda AR Prezidenti yanında
Dövlət İdarəçilik Akademiyası) fəaliyyət
göstərən Azərbaycan KP MK-nın Marksizm-Leninizm
Universitetini "əla" qiymətlə bitirmişdir.
1988-89-cu illərdə respublika Təhsil
Nazirliyinin ali təhsil üzrə tədris-metodika
kabinetində baş metodist vəzifəsində çalışan
K.Məcidov 1989-cu ilin mart ayında nazirliyin
nəzdində Respublika Tədris-Metodika Mərkəzində
ali təhsil üzrə metodkabinetin müdiri vəzifəsinə
təyin olunmuş və 1992-ci ilin iyun ayına kimi
orada işləmişdir. Bu dövrdə o, ali təhsil
müəssisələrində istehsalat (pedaqoji)
təcrübəsinin təşkili və keçirilməsinə metodik
köməklik istiqamətində əhəmiyyətli işlər
görmüşdür.
1992-ci ilin iyun ayından dekabr ayına kimi
nazirliyin Ali təhsil və elm idarəsində aparıcı,
həmin ilin dekabr ayından 1993-cü ilin noyabr
ayına kimi baş inspektor işləmişdir. 1993-cü
ilin noyabr ayından nazirliyin Ali və orta
ixtisas təhsili şöbəsində baş mütəxəssis
(sonradan baş məsləhətçi adlandırılıb)
vəzifəsinə təyin olunmuşdur.
1992-1997-ci illərdə Təhsil Nazirliyinin Elmi-Metodik
Şurasının "Əmək təlimi, tərbiyəsi və peşəyönümü"
bölməsinin sədri olmuş, bu sahədə onlarca
dərslik, dərs vəsaiti, metodik göstəriş və
tövsiyələrin, fənn proqramlarının işıq üzü
görməsinə qərar vermişdir.
1993-cü ilin fevralında Təhsil Nazirliyində
Nazirlər Kabinetinin qərarı ilə Dövlət Ali
Ekspert Komissiyası yaradılarkən K.Məcidov bu
qurumun məsul katibi təsdiq edilmişdir.
Nazirliyin aparatında işlədiyi müddət ərzində
Kamil Məcidov Dövlət Təhsil Standartlarının, ali
baza təhsili proqramları və tədris planlarının
hazırlanmasında yaxından iştirak etmişdir. O,
Azərbaycan Respublikası Təhsil Nazirliyi yanında
"Xarici ölkələrdə alınan ali təhsil haqqında
diplomların tanınması və ixtisasların
ekvivalentliyinin müəyyən edilməsi" ilə bağlı
fəaliyyət göstərən ekspert qrupunun üzvü, Təhsil
Nazirliyi nəzdində "Fasiləsiz pedaqoji təhsil"
üzrə Koordinasiya Şurasının məsul katibidir.
K.Məcidov nazirlikdə işlədiyi illərdə elmi
fəaliyyətdən də ayrılmamışdır. O, əmək tərbiyəsi
və peşəyönümü, texniki peşə təhsili ilə bağlı
bir sıra dissertasiyalara rəy vermiş,
opponentlik etmişdir.
Kamil müəllim həm də gözəl ailə başçısıdır.
Həyat yoldaşı Lətifə xanım dil-ədəbiyyat
müəllimidir. 40 ildən artıqdır ki, müəllimlik
fəaliyyəti ilə məşğuldur. Övladları Habil,
Mobil, Famil ali təhsil alıblar. Habil "Təfəkkür"
Universitetində çalışır. Mobil iqtisadiyyat üzrə
fəlsəfə doktorudur, Əmək və Sosial Münasibətlər
Akademiyasında kafedra müdiridir. Famil
Azərbaycan Dövlət Mədəniyyət və İncəsənət
Universitetinin magistraturasını rejissorluq
ixtisası üzrə bitirib. "Space" radiosunda diktor
işləyir. Övladlarının üçü də ailə həyatı qurub.
Gəlinləri Pərvanə 266, Səbinə 6 nömrəli
məktəblərdə ibtidai sinif müəllimi işləyirlər.
Lalə isə Bakı Pedaqoji Kadrların İxtisasartırma
və Yenidənhazırlanma İnstitutunun əməkdaşıdır.
Nəvələri Nihad, Nərmin, Lətifə məktəblidirlər.
Balaca Duyğunun isə 4 yaşı var. "Qərənfil" uşaq
bağçasında tərbiyə alır.
Dostum, həmkarım Kamil müəllimi ömrün 60-cı
mənzilinə yetişməsi münasibəti ilə təbrik edir,
ona möhkəm cansağlığı və fəaliyyətində daha
böyük uğurlar arzu edirəm.
Nazim KAZIMOV,
Azərbaycan Milli Konservatoriyası nəzdində
Musiqi Kollecinin direktoru,
əməkdar incəsənət xadimi, professor |
