Bu
günlərdə kiçikyaşlı uşaqların sevimli jurnalı
olan "Göyərçin"in 11 və 12-ci nömrələri işıq üzü
görüb. Yenicə çapdan çıxmış hər iki nömrə öz
nəfis tərtibatı ilə seçilir.
Dərginin 11-ci nömrəsi Rafiq Yusifoğlunun "Konstitusiya"
şeiri ilə açılır. Sonrakı al-əlvan səhifələrdə
İsmayıl İmanzadənin "Yurdumuzun çayları", "Kələm",
İbrahim Yusifoğlunun "Bulağın yolu" adlı
şeirləri uşaq təfəkkürünü, duyğularını əks
etdirən poeziya nümunələridir.
Jurnalın bu nömrəsində Günel Almazın "Buğda" , "Xoşbəxtlik",
"Yağış", "Ay və ayı" kiçik hekayələri, müxtəlif
ölkələrin nağıllarından, şeirlərindən tərcümələr
və başqa yazılar, şəkillər balaca oxucuları
düşündürən, onların maraq dünyası ilə səsləşən
mövzuları əhatə edir.
Dərginin 12-ci nömrəsinin 4 və 5-ci səhifəsində
görkəmli yazıçı, maarif xadimi Süleyman Sani
Axundovun "Süleyman Saninin çəliyi" və "Quş dili"
adlı ibrətamiz hekayələri verilib. Həmin
hekayələrə rəssam Mətanət də gözəl rəsmlər çəkib.
Jurnalın bu sayında da bir-birindən maraqlı
şeirlər, nağıllar, hekayələr, uşaqların çəkdiyi
rəsmlərdən nümunələr, fidan balaların ad günü
münasibəti ilə verilmiş təbriklər nömrəyə xüsusi
bir gözəllik və əlvanlıq gətirir.
ƏDALƏT |