|
Dekabrın 26-da Bakının Biləcəri qəsəbəsindəki
299 nömrəli məktəb-liseydə riyaziyyat aylığı
çərçivəsində "açıq dərs"lər keçirildi. Tədbir
iştirakçıları əvvəlcə məktəbin foyesində
riyaziyyat aylığına həsr olunmuş şagirdlərin əl
işlərindən ibarət sərgi ilə tanış oldular.
Şagirdlər qonaqlara riyaziyyat aylığı
çərçivəsində məktəbdə görülən işlər haqqında
ətraflı məlumat verdilər. Sonra riyaziyyat fənni
üzrə IV "a" sinfində Ballı Quliyevanın, I "b"
sinfində Lalə Həsənovanın, VIII "b" sinfində
Məlik Rüstəmovun "açıq dərs"lərində iştirak
etdilər.
Sonra proqramın gündəliyinə üyğun olaraq
riyaziyyat gecəsinə həsr edilmiş musiqili
ədəbi-bədii kompozisiya keçirildi. Qonaqları
məktəb kollektivinə təqdim edən təhsil ocağının
rəhbəri Solmaz Kazımova qarşıdan gələn 31 dekabr
- Dünya Azərbaycanlılarının Həmrəylik Günü və
Yeni il münasibəti ilə tədbir iştirakçılarını
təbrik etdi. Riyaziyyat aylığı çərçivəsində
məktəbdə görülən işlərdən bəhs edildi.
Tədbirdə iştirak edən Bakı Şəhəri üzrə Təhsil
İdarəsinin nümayəndəsi Vaqif Fərəcov gecənin və
"açıq dərs"lərin belə yüksək səviyyədə
keçirilməsinə görə məktəb kollektivinə
təşəkkürünü bildirdi.
Məktəb-liseyin şagirdləri riyaziyyat fənninə aid
şeirlərlə, mahnılarla həmin günü unudulmaz
xatirəyə çevirdilər. "Açıq dərs"lər qonaqlar
tərəfindən müzakirə edildi. Müəllimlərin işi
yüksək qiymətləndirildi.
Rəşad ZİYADOV |
