Mingəçevir ŞTŞ-dən verilən məlumatda bildirilir ki, bu günlərdə Mingəçevir Özəl Türk Liseyində şəhər icra hakimiyyəti və təhsil şöbəsinin dəstəyi ilə Beynəlxalq Türk dili müsabiqəsinin Mingəçevir ÖTL üzrə final mərhələsi keçirilib. Tədbirdə şəhər ictimaiyyətinin nümayəndələri, müxtəlif məktəblərin şagirdləri, müəllimlər və valideynlər iştirak edib.

Mahnı, şeir, qrammatika, inşa, sərbəst danışıq kateqoriyası üzrə keçən müsabiqə bir neçə mərhələdən ibarət olub. Birinci mərhələ dekabrın 15-də keçirilib. Həmin mərhələdə Mingəçevirdən şəhər liseyi, Texniki lisey, 3, 6, 8, 10, 13 nömrəli məktəblər və Bərdə şəhərindən akademik Z.Əliyeva adına liseyin şagirdləri qatılıb. Bu günlərdə isə Mingəçevirdə müsabiqənin final mərhələsi keçirilib. Müsabiqədə şagirdlər böyük həvəslə bir-birindən rəngarəng və maraqlı şeir və mahnılarla çıxış ediblər. Müsabiqədəki qiymətləndirməni Azərbaycan-Türkiyə özəl liseyləri tərəfindən təyin olunan münsiflər heyəti apararaq şeir kateqoriyasında birinci yerə Mingəçevir Şəhər Liseyinin şagirdi Leyla Xudadanovanı, ikinci yerə 13 nömrəli məktəbin şagirdi Nuramin Əliyevi, üçüncü yerə isə Mingəçevir Özəl Türk Liseyinin şagirdi Yavuz Sabirlini layiq biliblər.

Müsabiqənin mahnı kateqoriyasında birinci yerə Mingəçevir Texniki Liseyindən Əsmayə Kərimli, ikinci yerə 13 nömrəli məktəbdən Mustafa Mustafayev, üçüncü yerə isə şəhər liseyindən Fəiqə Məmmədova layiq görülüb.

Müsabiqə qaliblərin mükafatlandırılması ilə sona yetib. 

Ədalət DAŞDƏMİRLİ