Yanvarın
9-da Korrupsiyaya Qarşı Mübarizə üzrə QHT-lərin Məlumat
və Əməkdaşlıq Şəbəkəsi ADU-da qış imtahan sessiyasının
gedişi ilə bağlı monitorinq apardı. Monitorinqdə
Azərbaycan Dillər Universitetinin rektoru, millət
vəkili, professor Səməd Seyidov, Korrupsiyaya Qarşı
Mübarizə üzrə QHT-lərin Məlumat və Əməkdaşlıq
Şəbəkəsinin koordinatoru Əliməmməd Nuriyev, şəbəkəyə
daxil olan Korrupsiyaya Qarşı Mübarizə Fondunun icraçı
direktoru Vasif Mövsümov və Cəmiyyətin və Vətəndaş
Münasibətlərinin İnkişafı Mərkəzinin sədri Əhməd
Abbasbəyli iştirak edirdilər. Filologiya fakültəsində
keçilən "Dilçiliyə giriş", "Ədəbiyyatşünaslığa giriş" və
"Dünya ədəbiyyatı-2" imtahanlarının monitorinqi zamanı
ADU-nun rektoru Səməd Seyidov universitetdə keçirilən
imtahanlar barəsində qonaqlara məlumat verdi.
İmtahanların obyektiv, düzgün və şəffaf keçirildiyini
deyən rektor rəhbərlik etdiyi ali təhsil ocağının
monitorinq aparılması məqsədilə ictimai təşkilatlar
üçün açıq olduğunu bildirdi. Rektor şikayətlərlə bağlı
universitetdə operativ qərargahın, eyni zamanda "Qaynar
xətt"in fəaliyyət göstərdiyini tələbələrin diqqətinə
çatdırdı. ADU-da tələbələrin yüksək səviyyədə təhsilə
yiyələnmələri üçün lazımi imkanların mövcudluğundan
danışan S.Seyidov bu imkanlardan yararlanmağın vacib
olduğunu vurğuladı. Rəhbərlik etdiyi ali təhsil ocağının
beynəlxalq əlaqələrindən bəhs edən rektor gələcəkdə də
bu istiqamətdə bir sıra mühüm addımlar atılacağını
diqqətə çatdırdı. Normativ sənədlərə baxış keçirən
S.Seyidov imtahanlarda tələbələrə uğurlar arzuladı.
Fəaliyyət istiqamətləri haqqında tələbələrə məlumat
verən Korrupsiyaya Qarşı Mübarizə üzrə QHT-lərin
Məlumat və Əməkdaşlıq Şəbəkəsinin koordinatoru Əliməmməd
Nuriyev ali təhsil ocaqlarında imtahan sessiyalarının
gedişi ilə bağlı monitorinqlər aparıldığını bildirdi.
İmtahan sualları ilə maraqlanan koordinator aparılan
monitorinqlərin obyektivliyə xidmət etdiyini dedi.
Şəbəkə koordinatoru yaranan problemlərlə bağlı onlara
müraciət etməyin zəruriliyini önə çəkdi. Şəbəkə üzvləri
imtahan sənədlərinə də baxış keçirdilər. Tələbələr
imtahanların yüksək səviyyədə keçdiyini və biliklərini
nümayiş etdirmək üçün onlara yaxşı şəraitin
yaradıldığını bildirdilər.
Korrupsiyaya Qarşı Mübarizə üzrə QHT-lərin Məlumat və
Əməkdaşlıq Şəbəkəsinin koordinatoru Ə.Nuriyev
monitorinqlərin aparılması üçün yaradılan şəraitə görə
rektor S.Seyidova təşəkkürünü bildirdi.
Şakir CƏFƏROV |