Naxçıvan Dövlət Universitetitndə 20 Yanvar faciəsinə həsr olunmuş mərasim keçirildi. Giriş sözü ilə çıxış edən rektor, akademik İsa Həbibbəyli 20 Yanvarın Azərbaycan xalqının milli azadlıq hərəkatı və müstəqillik tarixində şanlı səhifə olduğunu qeyd etdi. Vurğulandı ki, bu faciə milli birlik və ləyaqətimizi sübut etdi, bütövlükdə zülmə, əsarətə, qətliama qarşı mübarizə rəmzinə çevrildi. Akademik, millət vəkili İsa Həbibbəyli xalqımıza qarşı törədilmiş qanlı terror aktına siyasi-hüquqi qiymət verilməsində ümummilli lider Heydər Əliyevin müstəsna xidmətlərindən bəhs etdi.

Azərbaycan xalqının milli müstəqilliyi uğrunda qurban getmiş şəhidlərin ruhu dərin ehtiramla yad edildi. Sonra Azərbaycan tarixi kafedrasının dosenti, tarix üzrə fəlsəfə doktoru Elçin Zamanov   "20 Yanvar - xalqımızın qan yaddaşı",  Ümumi tarix kafedrasının baş müəllimi, tarix elmləri namizədi Abdulla Mustafayev "20 Yanvar faciəsinin tarixi, sosial-siyasi kökləri və ibrət dərsləri", universitet Gənclər Təşkilatının sədri, magistr Arzu Abdullayev "Milli azadlıq uğrunda şərəfli mübarizə yolu" mövzusunda  məruzələr etdilər. Məruzələrdə qeyd olundu ki, bu faciə XX əsr boyu xalqımıza qarşı yeridilən, düşünülmüş siyasətin davamı idi. Azərbaycan ərazilərinin tədricən ilhaq olunması, qondarma Dağlıq Qarabağ münaqişəsi, azərbaycanlıların əzəli torpaqlarından qovulması, süqutu labüd olan işğalçı sovet imperiyasının özünüxilas cəhdləri Azərbaycan xalqını müstəqillik uğrunda ölüm-dirim mücadiləsinə qaldırmışdı. Milli azadlıq hərəkatını boğmaq üçün xəyanətkar  dövlət başçılarının dəstəyi ilə  keçmiş SSRİ-nin  böyük əksəriyyəti ermənilərdən ibarət olan silahlı ordusu Bakıda növbəti soyqırımı aktı törətmiş, 20 mindən artıq hərbçinin, güclü hərbi texnikanın iştirakı ilə dinc, günahsız insanlar, qadın və uşaqlar, qocalar kütləvi şəkildə qırılmış, eyni zamanda Naxçıvan erməni təcavüzünə məruz qalmışdır. Ümummilli lider Heydər Əliyevin hakimiyyətə gəlişi ilə ölkədə demokratiya və siyasi sabitlik bərqərar olmuş, müstəqil dövlət quruculuğu istiqamətində mühüm işlər görülmüşdür. Bu gün ölkə başçısı İlham Əliyevin yürütdüyü uğurlu siyasət nəticəsində müstəqil Azərbaycan siyasi, iqtisadi cəhətdən inkişaf edir, ərazi bütövlüyünün təmin olunması üçün qətiyyətli siyasi addımlar atılır.  

Mehriban SULTAN,
NDU-nun Mətbuat şöbəsinin müdiri