Yanvarın 18-də AMİ-də Milli İncəsənət Muzeyi əməkdaşları ilə birgə 20 Yanvar faciəsinin 22-ci ildönümünə həsr edilmiş tədbir keçirildi.

Öncə tədbir iştirakçıları 20 Yanvar faciəsini əks etdirən rəsm əsərlərindən ibarət sərgiyə baxdılar. Sonra tədbirdə faciə ilə bağlı film nümayiş etdirildi.

Tədbiri giriş sözü ilə institutun rektoru, millət vəkili, professor A.Naxçıvanlı açdı. Şəhidlərin ruhu bir dəqiqəlik sükutla yad edildi. Professor Aqiyə Naxçıvanlı bildirdi ki, 20 Yanvar faciəsi XX əsrdə Azərbaycan xalqına qarşı yeridilən imperiyapərəst siyasətin növbəti təzahürü idi. Xalqımıza qarşı soyqırımı, sovet hakimiyyəti illərində Azərbaycan ərazilərinin 125 min kvadrat kilometrdən  87 min kvadrat kilometrədək azalması, sovet rəhbərliyinin  havadarlığı ilə başlayan Dağlıq Qarabağ hadisələri və azərbaycanlıların Ermənistan ərazisindəki əzəli torpaqlarından qovulması bu çirkin siyasətin ayrı-ayrı mərhələləridir.

Qeyd edildi ki, 20 Yanvar hadisəsinə ilk olaraq ulu öndər Heydər Əliyev münasibət bildirdi. Ümummilli lider özünün  və yaxınlarının  həyatını  təhlükə qarşısında qoyaraq 1990-cı il yanvarın 21-də Azərbaycanın Moskvadakı daimi  nümayəndəliyinə gələrək azərbaycanlılar və xarici jurnalistlər qarşısında bəyanat verdi, Mixail Qorbaçovun xalqımıza düşmən siyasətini ifşa etdi. Heydər Əliyev bu hadisəni hüquqa, demokratiyaya və humanizmə zidd addım kimi dəyərləndirdi. Məhz ulu öndərin siyasi iradəsi sayəsində 20 Yanvarla bağlı informasiya blokadası yarılmış oldu.

Vətənimizin və xalqımızın tarixinə son dərəcə böhranlı illər kimi düşən bu dövrdə Azərbaycanın  bir dövlət olaraq mövcudluğu üçün  çox ciddi təhlükə yaranmışdı. Həm daxildən, həm də xaricdən olan düşmən qüvvələrin eyni vaxtda hərəkətə keçmələri, Azərbaycanı parçalayaraq məhv etmələri üçün  real təhlükə yaranmışdı. Azərbaycanı belə bir çox mürəkkəb və böhranlı durumdan ancaq və ancaq Heydər Əliyev xilas edə bilərdi və etdi də.

Vurğulandı ki, 1990-cı ilin  Yanvar qırğını nə qədər faciəli olsa da, Azərbaycan xalqının  iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan vətən oğulları Azərbaycan tarixinə parlaq səhifə yazdılar, xalqın milli azadlığı, müstəqilliyi üçün yol açdılar. Əfsuslar olsun ki, Azərbaycan dövlət müstəqilliyini əldə etdikdən sonrakı  ilk illərdə başı hakimiyyət uğrunda mübarizəyə qarışmış respublika rəhbərləri 20 Yanvar qırğınına siyasi-hüquqi qiymət verilməsi və cinayətkarların  müəyyən edilməsi istiqamətində heç bir iş aparmadılar. Yalnız 1993-cü ildə xalqın təkidli tələbi ilə Heydər Əliyevin hakimiyyətə qayıdışından sonra 20 Yanvar faciəsinə dövlət səviyyəsində siyasi-hüquqi qiymət verilmiş, xalqımıza qarşı törədilmiş bu ağır cinayətin səbəbləri araşdırılmış, cinayətkarların adları açıqlanmışdır.

Tədbirdə geniş məruzə ilə çıxış edən institutun ictimai fənlər kafedrasının müdiri, tarix elmləri doktoru Qafar Cəbiyev bu faciədən danışarkən bildirdi ki, şəhidlərin anım günü  bizim üçün həm də bir hesabat məqamıdır. Bu gün hər birimiz çox böyük qürur və iftixar hissi ilə deyə bilərik ki, 20 Yanvar şəhidlərinin mübarizəsi və fədakarlığı hədər getməmişdir. Onların uğrunda canlarını fəda etdikləri müstəqil Azərbaycan dövləti günü-gündən inkişaf edərək, qüdrətlənərək daha da çiçəklənir. Doğrudur, Qarabağ savaşı hələ ki, məntiqi sonluğuna çatmayıb, torpaqlarımız işğal altında qalmaqda davam edir. Amma inanın ki, bunun da bir sonu var. Qoy, hər kəs, o cümlədən  dostlarımız da, düşmənlərimiz də  əmin olsunlar ki, torpaqlarımız bütünlüklə azad olunanadək, qaçqın və köçkünlərimizin  sonuncu nümayəndəsi öz ata-baba  yurduna  dönənədək mübarizə  davam edəcəkdir. Biz gücümüzə, ordumuza, dövlətimizə, hökumətimizə güvənirik. Biz Prezidentimizə və Ali Baş Komandanımıza güvənirik. Biz haqqa, ədalətə güvənirik. Biz inanırıq ki, dünyanın  mütərəqqi qüvvələri Azərbaycanın haqq işini bundan sonra da dəstəkləyəcəklər.

Milli İncəsənət Muzeyinin direktor müavini Elmira Qasımova o qanlı faciənin canlı şahidi kimi öz xatirələrini tədbir iştirakçıları ilə bölüşdü.

Tədbirdə çıxış edən Azərbaycan Yazıçı Qadınlar Cəmiyyəti İctimai Birliyinin sədri Nüşabə Məmmədli, yazıçı-publisist Fazil Rəhmanzadə, faciə ilə bağlı ilk rəsm əsərinin müəllifi İlqar Əkbərov öz yaradıcılıqlarında 20 Yanvar faciəsinin əks etdirilməsindən danışdılar.