|
Bakının Xətai rayonundakı 287 nömrəli "Zəkalar"
liseyində və Nizami rayonundakı 129 nömrəli orta
məktəbdə 20 Yanvar şəhidlərinin xatirəsinə həsr olunan
müxtəlif tədbirlər keçirilmişdir.
287 nömrəli "Zəkalar" liseyində təlim-tərbiyə işləri
üzrə direktor müavini Nabat Rəfiyeva bildirmişdir
ki, 20 Yanvarla bağlı liseyin bütün siniflərində
təşkilat saatları keçirilmişdir. Sinif rəhbərləri
şagirdlərə 20 Yanvarın mahiyyəti, tarixi əhəmiyyəti
barədə ətraflı məlumat vermişlər. Zalda şagirdlərə qanlı
20 Yanvar gecəsini əks etdirən fraqmentlər, sənədli
süjetlər əsasında çəkilmiş "20 Yanvar" adlı video-klip
nümayiş etdirilmişdir.
"20 Yanvar şəhidləri" mövzusunda V-IX siniflərarası
divar qəzeti müsabiqəsində şagirdlər xüsusi fəallıq
göstərmişlər. Yekunda VI "a" sinfindən Aida Məmmədovanın
redaktorluğu ilə hazırlanan divar qəzeti birinci yeri
tutmuşdur.
IX-XI siniflər arasında liseydə keçirilən "20 Yanvar
xalqımızın qan salnaməsidir" adlı rəsm müsabiqəsində XI
"b" sinfindən Gülməmməd Əhmədlinin çəkdiyi rəsm
birincilik qazanmışdır. Bakı şəhər məktəbləri üzrə
keçirilən eyniadlı inşa müsabiqəsində isə liseyimizin X
"a" sinif şagirdi Aysel Babazadə yazdığı inşaya görə
qalib seçildi və "Gəncliyə yardım fondu" tərəfindən
mükafatlandırılmışdır.
V-VIII siniflər arasında "Qalx ayağa, Azərbaycan!" adlı
şeir müsabiqəsində vətənpərvərlik mövzusundakı şeirlərin
təsir gücünə görə VI "a" sinfindən Röyanə Əliyeva qalib
seçilmişdir.
Təbii ki, bizim bu qəbildən olan bütün tədbirlərimiz
mahiyyətcə bircə məqsədə xidmət edir. Tariximizi
unutmayaq, onu gənc nəslə tanıdaq!
Murad Umudlu
- 129 nömrəli orta məktəbin VIII "ç" sinif şagirdi:
- Dünən məktəbimizdə 20 Yanvar faciəsi qurbanlarının
xatirəsinə həsr edilmiş ədəbi-bədii tədbir keçirildi.
Məktəbin direktoru Əlibaba Paşayev tədbiri giriş sözü
ilə açıq elan etdi. O çıxışında dedi ki, 20 Yanvar
şəhidlərini tanımaq, müstəqilliyimizin, azadlığımızın
tarixini tanımağa bərabər bir vəzifədir. O gecə tökülən
şəhid qanları hamımızı, o cümlədən siz şagirdləri hər an
mübarizəyə çağırır.
Tarix müəllimi İlham Nərimanov da, fizika müəllimi
Həqiqət Əliyeva da 20 Yanvarla bağlı söylədikləri
çıxışda bir fikri vurğuladılar ki, ulu öndərimiz Heydər
Əliyevin dediyi kimi "Azərbaycanımızın müstəqilliyi
dönməzdir, əbədidir".
Tədbirin aparıcıları - VIII sinifdən Fəridə Əliyeva və
Mətin Ömərli - xalq şairi Məmməd Aslanın "Ağla, qərənfil,
ağla" şeirini söylədilər.
Tədbirdə məktəbin uşaq birliyinin rəhbəri Xalidə
Quliyevanın hazırladığı ssenari əsasında IX sinif
şagirdləri Səidə Abbasova, Əfsanə Qurbanzadə, Məryəm
Mahmudova, VIII sinifdən isə Xalidə Mehdiyeva, Zahidə
Xəlilli, Fərid Abışov, Səkinə Qasımova, Nərmin Muradova
20 Yanvar şəhidlərinin həyatını əks etdirən səhnəciklər
göstərdilər. "İlham və Fərizənin anaları" səhnəciyi daha
təsirli idi. İlhamın və Fərizənin anaları Şəhidlər
xiyabanında ağlarkən, gənc bir oğlan onlara yaxınlaşıb
deyir ki, analarım, silin gözlərinizin yaşını, biz
onların qanını yerdə qoymayacağıq, şəhidlərin yarımçıq
qalan azadlıq arzularını biz həyata keçirəcəyik.
Həmişə müəllimlərimizdən eşidirik ki, keçmişini unudan
gələcəyini qura bilməz. Odur ki, biz şagirdlər Vətən
uğrunda canından keçən şəhidlərimizin xatirəsini həmişə
uca tutmalıyıq. "20 Yanvar" hansı gündür - deyə məndən
soruşsalar, "Xalqımızın milli oyanışı günüdür" - deyərəm.
Ellada UMUDLU |
