Bakıdakı  Namiq Həmzəyev adına 238 nömrəli tam orta məktəbdə xalqımızın qan yaddaşına əbədi həkk olan 20 Yanvar faciəsi ilə əlaqədar "Şəhidlərin ruhu bizi mübarizəyə səsləyir" adlı  tədbir keçirildi. Əvvəlcə  şəhidlərin xatirəsinə həsr olunmuş şagirdlərin əl işlərindən ibarət sərgi nümayiş etdirildi. Dövlət himni ifa olundu. Sonra 20 Yanvar şəhidlərinin əziz xatirəsi bir dəqiqəlik sükutla yad edildi.

Tədbiri giriş sözü ilə açan məktəbin direktoru İlqar Talıbov bildirdi ki, 1990-cı il yanvarın 19-dan 20-nə keçən gecə Bakıda rus imperiyasının törətdiyi qanlı faciədən 22 il keçir. M.Qorbaçov başda olmaqla Sovet İttifaqının o vaxtkı rəhbərləri Azərbaycan xalqına xəbərdarlıq etmədən Bakıya qoşun yeritdilər, böyük faciə baş verdi. Həmin gecə günahsız, əliyalın insanlar küçədə, yaşadığı evlərində gülləbaran edildilər. Bu hadisənin səhəri günü ilk etiraz səsini qaldıran məhz Azərbaycan xalqının böyük oğlu, ulu öndər Heydər Əliyev oldu.  Ümummilli liderin Azərbaycan xalqının tələbi ilə ikinci dəfə hakimiyyətə gəlişindən sonra 20 Yanvar hadisəsinə siyasi qiymət verildi və əsl həqiqət dünyaya bəyan edildi.

Çıxış edən şagirdlər bildirdilər ki, vətənimizin igid  övladları Azərbaycanın  müstəqilliyi və torpaqlarımızın müdafiəsi uğrunda mərdliklə vuruşaraq şəhid olublar. Şəhidlik zirvəsinə ucalan qəhrəmanlar heç vaxt ölmürlər, onlar həmişə ürəklərdə yaşayırlar.

Tədbir şagirdlərin ifasında şəhidlərə həsr olunan şeirlərlə, mahnılarla, göstərilən səhnəciklərlə başa çatdı.

***

20 Yanvar faciəsinin iyirmi ikinci ildönümü münasibəti ilə Bakıdakı 304 nömrəli məktəb-liseydə də  anım mərasimi keçirildi. Tədbirdə öncə Azərbaycan xalqının  müstəqilliyi, suverenliyi, azadlığı, ərazi bütövlüyü  uğrunda qurban getmiş şəhidlərin əziz xatirəsi bir dəqiqəlik sükutla yad edildi. Dövlət himninin sədaları altında üçrəngli bayrağımız səhnəyə gətirildi.

Giriş sözü ilə çıxış edən məktəb-liseyn direktoru  İradə Hüseynova 20 Yanvarı Azərbaycan xalqının milli azadlıq hərəkatı və müstəqillik tarixinin şanlı səhifəsi, milli şərəf və ləyaqət məktəbi kimi səciyyələndirdi. O, bu tarixin işğalçı Sovet imperiyasının məhvinə xitam verdiyini, bütövlükdə zülmə, əsarətə qarşı mübarizə rəmzinə çevrildiyini xatırlatdı. Xalqımıza qarşı törədilmiş qanlı terror aktına siyasi-hüquqi qiymət verilməsində ümummilli lider Heydər Əliyevin müstəsna xidmətlərindən bəhs edildi.

Tədbirin aparıcıları 20 Yanvar faciəsinin acı nəticələrindən, şəhid olub əbədiyyətə qovuşan Vətən övladlarının şücaətindən söz açdılar.

Çıxış edən qonaqlar da 1990-cı ilin qanlı Yanvar hadisələri haqqında geniş danışaraq  təhsil ocaqlarında belə tədbirlərin keçirilməsini müsbət qiymətləndirdilər.  Qeyd olundu ki, o, vaxtkı Sovet rəhbərlərinin törətdiyi bu qanlı cinayət aksiyasının xalqımızın milli azadlıq hərəkatını boğmağa, ərazi bütövlüyümüzün qorunması naminə haqq səsimizi susdurmağa çalışan antihumanist siyasətin acı nəticəsidir. Şagirdlər şəhidlərə həsr olunmuş şeirlər, bayatılar söylədilər, ədəbi-bədii kompozisiya nümayiş etdirdilər. Sonra məktəb kollektivi Şəhidlər xiyabanına gedərək şəhidlərin məzarı önünə gül dəstələri qoydular.

***

Yanvarın 19-da 164 nömrəli  orta məktəbdə Azərbaycan xalqının tarixinə qanlı hərflərlə yazılmış 20 Yanvar faciəsinin  22-ci ildönümü münasibətilə ədəbi-bədii kompozisiya keçirildi. İlk öncə Dövlət himni səsləndirildi. Tədbir iştirakçıları  şəhidlərin  xatirəsini  yad edib, onlara Allahdan rəhmət dilədilər. Aparıcı Aytac İsgəndərli tədbirin məqsəd və məramından danışdı. Dağlıq Qarabağ münaqişəsinin tarixi kökləri, torpaqlarımızın 20 faizinin işğal olunmasının səbəblərini göstərərək, 20 Yanvar faciəsinin dünya ictimaiyyətinə, beynəlxalq aləmə çatdırılmasında, ona hüquqi və siyasi qiymət verilməsində Azərbaycan xalqının ümummilli lideri, ulu öndər Heydər Əliyevin tarixi xidmətlərini  iştirakçıların diqqətinə çatdırdı.

Sonra mərasim keçirilən salonu həzin musiqi sədaları bürüdü. V sinif şagirdləri - Aytac, Aytən, Xanım, Validə, Nərmin, Ləman, Nəzrin o müdhiş yanvar gecəsinin dəhşətlərini əks etdirən "Şəhidlər", "Al bayraq", "Azərbaycan", "Vətən bayatıları" şeirlərini söylədilər. "Qəhrəmanlar unudulmur" adlı anım mərasimi "Qalx ayağa, millətim" mahnısının sədaları altında  başa çatdı. Sonra tədbir iştirakçıları məktəbin foyesində  Qanlı Yanvar gününə həsr edilmiş  şəkillərə, hazırlanmış divar qəzetlərinə tamaşa etdilər. 

R.ZİYADOV,

S.SƏFƏROVA