Naxçıvan
Dövlət Universitetində dördüncü çağırış Naxçıvan Muxtar
Respublikası Ali Məclisinin dördüncü sessiyasının
yekunlarına və Naxçıvan Dövlət Universitetinin
qarşısında duran vəzifələrə həsr olunmuş yığıncaq
keçirildi.
Tədbiri giriş sözü ilə açan rektor, Milli Məclisin üzvü
İsa Həbibbəyli sessiyada müzakirə olunan məsələlər,
Naxçıvan Muxtar Respublikası Ali Məclisinin sədri Vasif
Talıbovun sessiyadakı məruzəsi barədə ətraflı məlumat
verdi. Ali Məclisin sədrinin məruzəsində öz əksini
tapmış, muxtar respublikanın 2011-ci ildəki sosial-iqtisadi
inkişafı ilə bağlı mühüm faktlara və statistik
göstəricilərə bir daha nəzər salındı. Qeyd olundu ki,
regionun sürətli sosial-iqtisadi tərəqqisi ölkədəki
iqtisadi və
ictimai-siyasi sabitliyin, ümummilli lider Heydər Əliyev
siyasətinin, onun müəyyənləşdirdiyi inkişaf
strategiyasının bəhrələridir. Ali Məclisin sədrinin də
məruzəsində qeyd olunduğu kimi, muxtar respublikanın
iqtisadi və sənaye potensialının gücləndirilməsi, müasir
infrastrukturun yaradılması ilə yanaşı elm və təhsil
sahəsində də mühüm müvəffəqiyyətlər qazanılmışdır.
Rektor, akademik İsa Həbibbəyli "Yeniləşmə ili" kimi
tarixləşən 2011-ci ilin Naxçıvan Dövlət Universiteti
üçün də əhəmiyyətli nailiyyətlərlə yaddaqalan olduğunu
vurğuladı. Belə ki, 2010-2011-ci tədris ilində Naxçıvan
Muxtar Respublikası Ali Məclisinin sədri Vasif
Talıbovun
iştirakı ilə ən müasir standartlara cavab verən 452
nəfərlik Tələbə evi, qonaq
evi,
üçmərtəbəli Tələbə sosial xidmət mərkəzi, magistratura
üzrə dekanlığın əsaslı şəkildə yenidən qurulmuş tədris
binası istifadəyə verilmişdir. Hazırda universitetin
pedaqoji, təbiətşünaslıq və kənd təsərrüfatı
fakültələrinin yerləşdiyi binada əsaslı təmir və
yenidənqurma işləri aparılır. Ötən tədris ilində
universitetdə 4 yeni ixtisas və kafedra açılmışdır.
Universitet ən müasir informasiya-kommunikasiya
texnologiyaları ilə təmin olunmuş, ötən il "Polycom HD
8000" markalı internet-konfrans kamerası, 69 yeni
kompüter, 9 kamera, 7 elektron lövhə, 1 proyektor
alınmışdır. Beynəlxalq əlaqələr sahəsində də böyük
uğurlar qazanılmış, Qafqaz Universitetləri Birliyi və
İpək Yolu Universitetləri Birliyi çərçivəsində
əməkdaşlıq müqavilələri imzalanmışdır.
Universitet Avropa Birliyinin TEMPUS proqramının
layihələrində uğurla təmsil olunmuş, ERASMUS-MUNDUS
layihəsi üzrə də tədbirlərin keçirilməsinə başlamışdır.
"Araz çayı hövzəsi parazitar xəstəliklər", "İnnovasiyaların
tətbiqi: inkişaf və müasirləşmə", "Elektron Naxçıvan 6:
Naxçıvan Dövlət Universiteti və əlaqədar olduğu lokal
şəbəkədə İKT-nin vəziyyəti", "Naxçıvan ilk yaşayış və
şəhərsalma yeri kimi", Qafqaz Universitetlər Birliyinin
Birinci Naxçıvan Beynəlxalq Gənclik Simpoziumu kimi
beynəlxalq, respublika və muxtar respublika səviyyəli
simpoziumların təşkilatçısı və iştirakçısı olmuşdur.
Universitet əməkdaşları qardaş Türkiyə Cümhuriyyəti,
İran İslam Respublikası ilə yanaşı İngiltərə, Almaniya,
İtaliya, Fransa, İspaniya kimi inkişaf etmiş Avropa
ölkələrində də olmuşlar. Bütün bunlar elmin, təhsilin
inkişafında mühüm irəliləyişlərlə nəticələnmişdir.
Rektor, akademik İsa Həbibbəyli çıxışının sonunda əmin
olduğunu bildirdi ki, universitet kollektivi dördüncü
çağırış Naxçıvan Muxtar Respublikası Ali Məclisinin
dördüncü sessiyasında ali təhsil strukturunun inkişafı
istiqamətində qarşıya qoyulan mühüm vəzifələrin, Ali
Məclisin sədrinin proqram xarakterli məruzəsindəki mühüm
tövsiyə və tapşırıqların həyata keçirilməsi
istiqamətində əzmlə çalışacaq, 2012-ci ili - milli
dəyərlər ilini daha böyük müvəffəqiyyətlərlə başa
vuracaq.
Universitetin tədris işləri üzrə prorektoru, filologiya
üzrə fəlsəfə doktoru, dosent Seyid Surə çıxış edərək
bildirdi ki, bakalavr səviyyəsində 47, magistratura
səviyyəsində 39 ixtisas üzrə yüksək ixtisaslı
mütəxəssislər hazırlanan universitetdə hazırda 4499
nəfər, o cümlədən 212 xarici vətəndaş təhsil alır. Ötən
tədris ili universiteti bakalavr səviyyəsində 969 nəfər,
magistratura üzrə 84 nəfər bitirmişdir ki, onlardan 267
nəfəri ali təhsilini fərqlənmə diplomu ilə başa
vurmuşdur.
Əyani şöbələrin I, II və III kurslarında Boloniya
prosesinin tələblərinə uyğun olaraq təhsilin kredit
sistemi ilə təşkili uğurlu nəticə vermişdir. Belə ki,
2010-2011-ci tədris ilində müvəffəqiyyət göstəricisi 94,
keyfiyyət göstəricisi isə 84% olmuşdur ki, bu nəticələr
də ölkənin orta təhsil göstəricilərindən yüksəkdir.
Hesabat ilində imtahan sessiyalarında yazılı
monitorinqlərin tətbiqi genişləndirilmiş, buraxılış
işlərinin, magistr dissertasiyalarının səviyyəsinin daha
da yaxşılaşdırılmasına diqqət artırılmışdır. Tədris
işləri üzrə prorektor Ali Məclisin növbəti sessiyasından
irəli gələn vəzifələrin yerinə yetirilməsi, tədrisin
yüksək və müasir səviyyədə qurulması üçün görüləcək
işlərdən danışdı.
Yığıncaqda universitet YAP ərazi ilk təşkilatının sədri,
pedaqoji elmlər üzrə fəlsəfə doktoru, dosent, əməkdar
müəllim Kamal Camalov, rabitə və informasiya
texnologiyaları kafedrasının müdiri, texnika üzrə
fəlsəfə doktoru, dosent Cavanşir Zeynalov, sosial
idarəetmə və turizm kafedrasının baş müəllimi, iqtisad
elmləri üzrə fəlsəfə doktoru Əli Cabbarov, universitet
gənclik təşkilatının sədri, magistr Arzu Abdullayev
çıxış edərək universitetin digər sahələrdəki ötənilki
uğurlarından, prioritet vəzifələrdən danışdılar.
Mehriban SULTAN |