İmişli RTŞ-dan aldığımız məlumatda bildirilir ki, bu günlərdə rayonun ümumtəhsil məktəblərində işləyən praktik psixoloqların seminarı keçirilib. Seminarda ümumtəhsil məktəblərində psixoloji xidmət işinin təşkili, psixoloji maarifləndirmə, istedadlı uşaqlarla həyata keçirilən tədbirlərin spesifik xüsusiyyətləri ilə bağlı məsələlər müzakirə edilib.

İmişli RTŞ-ın müdir müavini Vahid Tağıyev təhsil müəssisələrində təlim-tərbiyə işinin keyfiyyətinin yüksəldilməsində məktəb praktik psixoloqlarının rolu, cəmiyyətin, o cümlədən təhsilin hazırkı inkişaf mərhələsində psixoloji xidmətin zərurət və tələbata çevrilməsi barədə seminar iştirakçılarına ətraflı məlumat verib.

Uşaqların I sinfə qəbulu, psixodiaqnostik müşahidə, sinifdən-sinfə keçid zamanı şagirdlərdə baş verən dəyişikliklər, mərkəzləşdirilmiş qaydada buraxılış imtahanlarına hazırlıq işində psixoloqların görməli olduğu tədbirlər ətrafında fikir mübadiləsi aparılıb.

Seminarda qabaqcıl iş təcrübəsi öyrənilərək rayonda yayılmış Bəhrəmtəpə qəsəbə tam orta məktəbinin psixoloqu Hafizə Həmzəyeva işlədiyi məktəbdə fəaliyyəti zamanı tətbiq etdiyi yeniliklər barədə söhbət açıb, diaqnostik, korreksiya, maarifləndirici testləri, dərsin psixoloji təhlili nümunələrini tədbir iştirakçılarına sənədlər vasitəsilə nümayiş etdirib.

Müzakirə zamanı məktəb psixoloqlarından Valeh Əliyev, Umudvar Eyvazov, Razi Şərifov, Şəhla Abbasova, Ağa Abdullayev, İradə Mehdiyeva, Vəfa Abdullayeva və başqaları psixoloji xidmət kabinetinin, dərs cədvəlinin tərtibi və dinlənilmiş dərsin psixoloji təhlili, istedadlı şagirdlərlə iş, çətin tərbiyə olunan uşaqlarla korreksiya, məktəb-valideyn əlaqələri və digər məsələlər ətrafında fikir mübadiləsi aparıblar.

Qeyd olunub ki, məktəbdə psixoloji xidmətin yüksək səviyyədə təşkili məktəb rəhbəri, müəllim, sinif rəhbəri, şagirdlər, valideynlər, təhsil şöbəsi, QHT-lər və məktəbəqədər tərbiyə müəssisələri ilə qarşılıqlı əlaqələrin düzgün qurulmasından asılıdır.

Seminarda pedaqoji mətbuatda dərc olunmuş məqalə və yazıların psixoloqlara böyük köməyi olduğu qeyd olunmaqla, belə tədbirlərin mütəmadi keçirilməsinin səmərəliliyi yekdil fikir kimi səslənib.