Azərbaycanın Milli Qəhrəmanı, şəhid E.Tağızadənin adını
daşıyan Bakıdakı 164 nömrəli tam orta məktəbdə tarix
müəllimləri Nailə Manafova və Səbinə Şahmalıyevanın
təşkilatçılığı ilə Sovet İttifaqı Qəhrəmanı, şərqşünas
alim, tarixçi, Azərbaycan EA-nın vitse-prezidenti,
Dövlət mükafatı laureatı, əməkdar elm xadimi, mərhum
Ziya Bünyadova həsr edilmiş "dəyirmi masa" keçirilib.
Müəllimlər çıxış edərək alimin həyat yolu barədə
tədbir iştirakçılarına ətraflı məlumat veribər.
Məktəbin direktoru Kəmalə Qədirova isə çıxışında Ziya
Bünyadovun gözəl tarixçi alim olduğunu, onun
Azərbaycanın tarixini gözəl bildiyini, öz çıxışlarında
dəfələrlə saxtakar erməni tarixçilərini qamçıladığını,
onların əsassız faktlara söykənən iddialarını ifşa
etdiyini qeyd edib.
Şagirdlərdən Arif Mustafayev, Güllü Məmmədova, Xanım
Həsənova və başqaları çıxış edərək görkəmli alimin
tarixi axtarışlarından, Azərbaycan xalqı qarşısında
gördüyü işlərdən danışıb.
Sonra şagirdlərin görkəmli alimə həsr etdikləri
prezentasiyalara baxış keçirilib.
Sifai SƏFƏROVA |