Ağsu Rayon Təhsil Şöbəsinin müdiri  Tahir Xasidən aldığımız məlumatda bildirilir ki, Azərbaycan dövlətinin təhsilə göstərdiyi qayğının ən bariz nümunələrindən biri  "2008-2012-ci illərdə Azərbaycan Respublikasında  təhsil sisteminin informasiyalaşdırılması üzrə Dövlət Proqramı"dır. Bu çərçivədə həyata keçirilən işlərdən biri  də Təhsil Nazirliyinin tərəfdaşlarından olan "MƏDƏD" təşkilatının həyata keçirdiyi  Müəllimlərin Peşəkarlıq Səviyyəsinin Təkmilləşdirilməsi (MPST) kurslarıdır. Bu kurslar respublikamızın əksər bölgələri ilə yanaşı, Ağsu rayonunda,  1 nömrəli məktəb-liseydə də uğurla həyata keçirilir. Təlimlər 2 nəfər təlimçi ilə 6 gün aparılır. Təlimlərdə 15-20 nəfərlik  qruplar iştirak edir. Müəllimlərin kurslara cəlb edilməsi təhsil şöbəsi tərəfindən tənzimlənir.

Təlim zamanı müəllimlər 5 kompüter proqramı ilə tanış olurlar. Bu isə onların gələcəkdə dərslərini İKT və digər mümkün avadanlıqlarla zənginləşdirmələrinə çox kömək edir. Bununla yanaşı, müəllimlər beynəlxalq aləmdə geniş qəbul olunmuş konstruktivizm nəzəriyyəsi və BLUM  taksonomiyası ilə də tanış olurlar. Müəllimlər bu nəzəriyyələrdən, kompüter proqramından və fəal təlimdən istifadə edərək müasir tələblərə cavab verən dərslər qururlar. Kursun son günü isə müəllimlər imtahandan keçirilir. Onlara sertifikatların verilməsi bu imtahanların nəticələrinə görə müəyyənləşdirilir.

Şakir CƏFƏROV