Fevralın
17-də Akademik Milli Dram Teatrında Təhsil Nazirliyi və
"Çağ" Öyrətim İşlətmələri Şirkəti tərəfindən "Dilimiz
varlığımızdır" devizi altında təşkil olunmuş IX ənənəvi
"Ana dilimizi sevək, sevdirək" müsabiqəsinin yekun
mərhələsi keçirildi. Mərasimi giriş sözü ilə açan
müsabiqənin Təşkilat Komitəsinin sədri, Azərbaycan-Türkiyə
Özəl Liseyləri Baş İdarəsinin rəisi Arif Gömləksiz belə
bir tədbirin keçirilməsinin əhəmiyyətindən söz açdı.
İdarə rəisinin verdiyi məlumatdan aydın oldu ki, YUNESKO-nun
1999-cu ilin noyabrında elan etdiyi Beynəlxalq Ana Dili
Gününə həsr olunmuş "Ana dilimizi sevək, sevdirək"
müsabiqəsi Azərbaycanda fəaliyyət göstərən "Çağ" Öyrətim
İşlətmələri Azərbaycan-Türkiyə Özəl Liseyləri tərəfindən
2004-cü ilin fevral ayından başlayaraq hər il keçirilir.
Müsabiqənin keçirilməsində məqsəd keçmişdən bizə miras
qalan ən təkmil, mükəmməl dil səviyyəsinə qalxmış
sərvətimizi, milli dəyərimiz olan ana dilimizi gələcək
nəslə çatdırmaqdır.
Bu müsabiqə əvvəlki illərdə Azərbaycanda fəaliyyət
göstərən Azərbaycan-Türkiyə Özəl Liseyləri arasında
təşkil olunurdu. İnşa və qrammatika nominasiyaları üzrə
keçirilən müsabiqədə yalnız bu liseylərdə təhsil alan
VII-XI sinif şagirdləri iştirak edirdi. 2006-cı ildə ilk
iki kateqoriyaya İnternet səhifəsi hazırlamaq, mahnı,
şeir nominasiyaları da əlavə olundu və müsabiqə 2008-ci
ildən artıq respublika səviyyəsində keçirilməyə başladı.
Qaydaya əsasən, inşa, qrammatika, İnternet səhifəsi
hazırlamaq üzrə yarışlarda IX-XI sinif şagirdləri, mahnı
və şeir üzrə müsabiqələrdə isə VII-XI sinif şagirdləri
iştirak edirlər.
Arif Gömləksiz diqqətə çatdırdı ki, dörd mərhələdən
ibarət olan (məktəbdaxili, rayon (şəhər), yarımfinal və
respublika) müsabiqənin qrammatika, inşa, İnternet
səhifəsinin hazırlanması kateqoriyaları üzrə yarışlara
artıq yekun vurulub və qaliblər müəyyənləşdirilib.
Daha sonra mahnı və şeir nominasiyaları üzrə
iştirakçılar səhnəyə dəvət olundular. 9 nəfərdən ibarət
münsiflər heyətinin qərarı ilə şeir nominasiyası üzrə
müsabiqədə Mirvarid Dilbazinin "Azərbaycan" şeirini
söyləyən Gəncə şəhər 39 nömrəli tam orta məktəbin
şagirdi Tünzalə Allahverdiyeva I yerə layiq görüldü.
Mahnı kateqoriyasında isə Bəhram Nəsibovun "Qal, sənə
qurban" mahnısı ilə salonu coşduran Ağdaş rayonu Tofiqi
kənd tam orta məktəbinin şagirdi İsmayıl İsgəndərov
qalib seçildi. Şeir kateqoriyası üzrə İlham Quliyev
(Sumqayıt) II, Nigar Bayramova (Mingəçevir) III, mahnı
kateqoriyası üzrə Əli Əliyev (Bakı) II, Zeynəb
Abdullayeva (Gəncə) III yerə sahib çıxdılar. Müsabiqə
qaliblərinə qızıl, gümüş, bürünc medallarla yanaşı, pul
mükafatı və xüsusi sertifikat, habelə digər hədiyyələr
verildi.
Tədbirdə çıxış edən təhsil nazirinin müavini Qulu
Novruzov məktəblilərin ifalarının iştirakçılara
həyəcanlı anlar yaşatdığını söylədi. "Dili sevənlər
çoxdur, lakin onu sevdirməyi də bacarmaq lazımdır" -
deyən Q.Novruzov bu baxımdan ulu öndər Heydər Əliyevin
xidmətlərini xüsusi qeyd etdi. Bildirdi ki, dilimiz məhz
ümummilli liderimizin sayəsində bütün dünyada daha çox
tanınıb. Belə müsabiqələrin ana dilimizin dərindən
öyrənilməsində və sevilməsində mühüm əhəmiyyət kəsb
etdiyini vurğulayan təhsil nazirinin müavini bu ənənəni
yaşadan "Çağ" Öyrətim İşlətmələri Şirkətinin
rəhbərliyinə minnətdarlığını bildirdi.
Səhiyyə nazirinin müavini Elsevər Ağayev də bu tədbirin
dilin mükəmməl öyrənilməsində və təbliğində önəmli rol
oynadığını dedi.
"Çağ" Öyrətim İşlətmələri Şirkətinin prezidenti Ənvər
Özərənin çıxışında qeyd olundu ki, bu dil mahnı, şeir
dili ilə daha çox sərhədlər aşmağa qadirdir. Hansı
ölkədə olmağımızdan asılı olmayaraq, dilimizi yaşatmalı,
onu dünyaya sevdirməliyik: "Zənnimcə, bu istiqamətdə
"Ana dilimizi sevək, sevdirək" müsabiqəsi öz sözünü deyə
bilir. Belə ki, bu yarışmanın qalibləri hər il Türkiyədə
keçirilən Türkcə Olimpiadası çərçivəsində Azərbaycanı
təmsil edir, orada ölkənin mənəvi dəyərlərini dünyaya
təqdim edirlər".
Hicran ƏKBƏROVA |