Naxçıvan Özəl Universitetində "Xocalı -XX əsrin
faciəsidir" mövzusunda elmi-praktik konfrans
keçirilmişdir. Tədbir iştirakçıları konfransdan əvvəl
universitetin kitabxanasında təşkil edilmiş soyqırımın
dəhşətlərini əks etdirən sərgiyə baxmışlar.
Universitetin akt zalında davam edən konfransda ali
təhsil ocağının rektoru, professor İsmayıl Əliyev çıxış
edərək bildirmişdir ki, o zaman erməni quldurları
tərəfindən Xocalıda xalqımıza qarşı törədilən soyqırımı
barədə dünya ictimaiyyətinə məlumat verilmədi, faciənin
əsl mahiyyətinə aydınlıq gətirilmədi. Ümummilli
liderimiz Heydər Əliyev xalqın təkidli tələbi ilə
Azərbaycana ikinci dəfə siyasi hakimiyyətə gələndən
sonra faciəyə siyasi qiymət verildi. Ümummilli
liderimizin imzaladığı fərmanla hər il fevralın 26-sı
Xocalı soyqırımı günü kimi qeyd olunur. 20 il keçməsinə
baxmayaraq, bu faciə heç vaxt unudulmayacaq. Bu gün
torpaqlarımızı erməni işğalçılarından təmizləməyə
gücümüz, qüvvəmiz və qüdrətli ordumuz var. Ölkəmizdə
aparılan uğurlu xarici siyasət nəticəsində Azərbaycanın
işğal olunmuş torpaqları azad ediləcək, xocalılar da öz
doğma yurdlarına qayıdacaqlar.
Tədris və elmi işlər üzrə prorektor İbrahim Kazımbəyli
və tərbiyə işləri üzrə prorektor Əli Yusifov
çıxışlarında vurğulamışlar ki, ulu öndərimizin siyasi
kursunun layiqli davamçısı Azərbaycan Respublikasının
Prezidenti İlham Əliyev haqq səsimizin dünya
ictimaiyyətinə çatdırılması, Xocalı soyqırımının
tanınması istiqamətində yorulmaq bilmədən çalışır, bu
sahədə ardıcıl iş aparır. Sonda Xocalı soyqırımını
əks etdirən sənədli film nümayiş etdirilmişdir.
Nuray ƏSGƏROVA |