Bakının
Səbail Rayon Mərkəzləşdirilmiş Kitabxana Sisteminin
Mərkəzi Kitabxanasında 21 fevral- Beynəlxalq Ana Dili
Gününə həsr olunmuş tədbir keçirilib. Tədbiri giriş sözü
ilə kitabxananın direktoru Nüşabə Ələkbərova açaraq
bildirdi ki, bizim sevimli dilimiz olan Azərbaycan
dilini ulu babalarımız və ulu öndərimiz Heydər Əliyev
çox sevib, ona həmişə böyük qiymət verib və deyib: "Dilimiz
çox zəngin və ahəngdar dildir, dərin tarixi köklərə
malikdir. Şəxsən mən öz ana dilimi çox sevir və bu dildə
danışmağımla fəxr edirəm".
Bəli, dünyanın ən qədim dillərindən sayılan dilimizi biz
də dərindən bilməli, sevməli və onun saflığını
qorumalıyıq.
Tədbirdə geniş məruzə ilə çıxış edən kitabxananın
əməkdaşı Şəbnəm Babaşova bildirdi ki, Beynəlxalq Ana
Dili Günü YUNESKO tərəfindən 1999-cu il fevralın 21-də
elan edilib.
Azərbaycan dili də dünya dilləri ailəsinin bir üzvüdür.
Onun tarixi xalqımızın tarixi deməkdir. Ölkəmizdə ana
dilinin hərtərəfli inkişafı, işlək dilə çevrilməsi,
beynəlxalq münasibətlər sisteminə yol açması ulu öndər
Heydər Əliyevin dilin qorunmasına yönələn düşünülmüş
siyasətinin nəticəsidir.
Bu ənənələri ölkə Prezidenti İlham Əliyev də uğurla
davam etdirməkdədir. Dövlət başçısının müxtəlif
vaxtlarda imzaladığı Azərbaycan dilində latın qrafikası
ilə kütləvi nəşrlərin həyata keçirilməsi haqqında və
Azərbaycan Milli Ensiklopediyasının hazırlanması
haqqında sərəncamları və bu istiqamətdə görülən işlər
dilimizin inkişafına böyük qayğının təzahürüdür.
Mərasimdə kitabxananın fəal oxucularından olan,
filologiya üzrə fəlsəfə doktoru Rasim Nəbioğlu, Cəlil
Məmmədquluzadənin ev-muzeyinin böyük elmi işçisi Yeganə
Məmmədova da çıxış edərək ana dilimizi zənginləşdirməyin,
yad ünsürlərdən qorumağın, onu sevməyin vacibliyini
vurğuladılar.
Tədbirdə Bakıdakı 189 nömrəli tam orta məktəbin
metodbirləşmə sədri Təranə Rzayeva, Azərbaycan dili və
ədəbiyyat müəllimləri Cəmilə Bayram, Xanım Rzayeva və
Ləman Qurbanovanın rəhbərliyi ilə VII "d" sinif
şagirdlərinin hazırladığı Vətənə, anaya və doğma
dilimizə aid şairlərimizin yazdığı şeirlərdən nümunələr
söylədilər.
Sonda iştirakçılar kitabxananın şöbə müdiri Cəmilə
Səmədovanın təşkil etdiyi "Ana dilimiz-milli sərvətimiz"
adlı kitab sərgisinə və C. Məmmədquluzadənin ev-muzeyinin
əməkdaşları Saleh İbrahimov və Nigar Səfərovanın səyi
ilə tərtib olunaraq, Cəlil Məmmədquluzadənin həyat və
yaradıcılığını əks etdirən fotostendlərə böyük maraqla
tamaşa etdilər.
Ədalət DAŞDƏMİRLİ |