"Çağ" Öyrətim Şirkətinin "Araz" ali məktəblərə hazırlıq
kursları artıq 4 ildir ki, ölkənin ümumtəhsil
məktəblərinin VIII və IX sinif şagirdləri arasında "Bilik
yarışı" təşkil edir. Şirkətin Azərbaycandakı
fəaliyyətinin 20 illiyinə həsr olunmuş builki yarışma "Müasir
Azərbaycan və "Çağ" Öyrətim" devizi altında
keçirilmişdir. Fevralın 18-də "Araz" Kursları Baş
İdarəsinin yerləşdiyi Bakı Asiya Universitetinin
binasında yarışlarda ən yüksək nəticə göstərən
şagirdlərin mükafatlandırılması mərasimi oldu.
Tədbir Xocalı faciəsi qurbanlarının və ölkəmizin
azadlığı uğrunda mübarizədə şəhid olanların xatirəsinin
bir dəqiqəlik sükutla yad olunması və Dövlət himninin
səsləndirilməsi ilə açıldı. Sonra "Çağ" Öyrətim
Şirkətinin ölkəmizdəki fəaliyyətindən bəhs edən
qısametrajlı film nümayiş etdirildi. Filmdə "Araz"
kurslarının uğurları da yer almışdı.
"Araz" Kursları Baş İdarəsinin rəisi İrfan Uzundəmir
mərasimdə söylədiyi təbrik nitqində rəhbərlik etdiyi
qurumun fəaliyyətindən, həyata keçirdiyi layihələrdən
söz açaraq bildirdi ki, Azərbaycanda ali məktəblərə
qəbul imtahanlarının test sistemi ilə keçirilməyə
başlandığı dövrdən "Araz" kursları təhsilimizə öz
köməyini əsirgəməmişdir. Yarandığı gündən təhsil
ictimaiyyətinin diqqətini özünə çəkməyə müvəffəq olan "Araz"
kursları test təcrübəsini çox uğurla Azərbaycanda tətbiq
edir. 20 il öncə Bakı şəhərində cəmi bir kursla
bünövrəsi qoyulan "Araz" kursları hazırda
respublikamızın 10 müxtəlif şəhər və rayon mərkəzində 12
kursla fəaliyyətini davam etdirir.
"Araz" kursları ali məktəblərə yüksək səviyyədə
hazırlaşmağı hədəfləyən 9, 10 və 11-ci sinif
şagirdlərinin, həmçinin orta məktəb məzunlarının ən çox
seçdiyi yoldur. Kurslarda dərslər 12-16 nəfərlik qruplar
halında həftədə 3 dəfə olmaqla, Tələbə Qəbulu üzrə
Dövlət Komissiyasının elan etdiyi qəbul proqramlarına
əsasən keçilir.
İrfan bəy əldə olunmuş uğurlardan da danışaraq qeyd etdi
ki, kursların məzunları 20 ildə 46 dəfə ən yüksək nəticə
əldə etmiş, 113 məzun Prezident təqaüdünə layiq
görülmüşdür. Ümumilikdə 1235 nəfər 600-dən yuxarı bal
toplamışdır. Bu kurslarda ali məktəblərə hazırlaşmış 8
abituriyent imtahanlardan maksimum nəticə göstərərək 700
bal toplamışdır.
İdarə rəisi "Araz" kurslarının təhsil ictimaiyyətini,
eləcə də yuxarı sinif şagirdlərini daim yenilikləri ilə
də sevindirdiyini deyərək cari tədris ilində yeni - "Video
həllər" layihəsinin əsasının qoyulduğunu, həmin layihəyə
əsasən "Araz" kurslarının sınaq imtahanlarında iştirak
edən abituriyentlərin imtahanlarda istifadə olunan test
tapşırıqlarının həlli və şifahi izahı ilə heç kimin
köməyi olmadan imtahandan cəmi iki saat sonra tanış ola
biləcəklərini bildirdi.
"Bilik yarışı"nın nəticələrini diqqətə çatdıran
İ.Uzundəmir builki yarışmada 3432-si VIII, 4981-i isə IX
sinif şagirdi olmaqla bütövlükdə 8223 şagirdin öz
biliyini nümayiş etdirdiyini söylədi. Bildirdi ki, hər
qrup üzrə yüksək bal toplayanlar bölgələrdə olan "Araz"
kurslarının keçirdiyi tədbirlərdə mükafatlandırılmışlar.
Bugünkü tədbirdə həm VIII, həm də IX siniflər üzrə ən
yüksək nəticə əldə etmiş 20 şagird mükafatlandırılacaq.
Sonra İrfan Uzundəmir qalibləri, onların təmsil
etdikləri məktəblərin direktorlarını təbrik etdi.
Qaliblər qrup-qrup səhnəyə dəvət olunaraq onlara fəxri
fərmanlar və xatirə hədiyyələri təqdim olundu. Qalib
şagirdlərlə bərabər onların oxuduqları məktəblərin
direktorları da mükafatlandırıldılar.
Mükafatları şagirdlərə və direktorlara təqdim edən
Qafqaz Universitetinin rektoru, professor Əhməd Saniç,
"Araz" Kursları Baş İdarəsinin rəisi İrfan Uzundəmir,
Türkiyə Respublikasının ölkəmizdəki səfirliyinin təhsil
müşaviri Halis Koyuncuoğlu, Bakı Şəhəri üzrə Təhsil
İdarəsi müdirinin müavini Məhəmməd Bayramov,
Türkiyə-Azərbaycan Özəl Liseyləri Baş İdarəsinin rəisi
Arif Gömləksiz və başqaları onlara təhsildə, gələcək
fəaliyyətlərində daha böyük uğurlar arzuladılar, "Bilik
yarışı"nın əhəmiyyətini yüksək qiymətləndirib onun
təşkilatçılarına təşəkkür etdilər.
Yusif ƏLİYEV |