Bakıdakı
A.Səfərov adına 114 nömrəli tam orta məktəbdə 1 mart -
Beynəlxalq Mülki Müdafiə günü münasibəti ilə tədbir
keçirildi. Tədbirdə məktəbin kollektivi ilə yanaşı,
Suraxanı Rayon İcra Hakimiyyətindən, Fövqəladə Hallar
Nazirliyindən nümayəndələr və KİV təmsilçiləri iştirak
edirdilər.
Qonaqlar əvvəlcə ulu öndər Heydər Əliyev Muzeyinə
baxdılar. Sonra fövqəladə hallar zamanı istifadə olunan
əleyhqazlar və kimyəvi cihazlarla tanış oldular.
Şagirdlər kimyəvi cihazların və əleyhqaz
avadanlıqlarının işlənmə qaydası haqqında tədbir
iştirakçılarına məlumat verdilər. Qonaqlar həmçinin
məktəbin şagird və məzunlarının "Şahin" hərbi idman
oyunlarında və müxtəlif idman yarışlarında qazandıqları
qələbələri əks etdirən fotogüşə ilə də tanış oldular.
Sonra idman zalında keçirilən yarışları izlədilər.
Tədbir iştirakçıları həmin gün məktəbdə keçirilən mülki
müdafiə hazırlığı dərslərini dinlədilər. Dərslərdə
şagirdlər fövqəladə hadisələr zamanı hansı addımları
atmaq lazım gəlməsi barədə məlumat verdilər.
Məktəbin həyətində təşkil olunmuş mərasim hamının diqqət
mərkəzində idi. Belə ki, fövqəladə hadisə zamanı təcili
tibbi yardım maşınından tutmuş yanğınsöndürən maşına
qədər böyük bir qrup öz işini görürdü. Əvvəlcə
xilasedicilər binanı nəzarətə götürdülər. Əhalini
partlayış baş verən ərazidən uzaqlaşdırıb əleyhqazlar və
aspiratorlarla təhlükəsiz sığınacaqlara yerləşdirdilər.
Xəsarət alanlara isə tibb işçiləri ilkin tibbi yardım
göstərdikdən sonra tibbi yardım maşınlarına yerləşdirib
xəstəxanalara apardılar. Yanğın böyük ərazini əhatə
etdiyindən yanğınsöndürənlərin işi bir az çətin oldu.
Gücləndirilmiş iş rejimində işləyən xilasedicilər
işlərini uğurla tamamladılar.
Məktəbin direktoru Ceyran Novruzova tədbirdə
iştiraklarına görə qonaqlara məktəb kollektivi adından
minnətdarlığını bildirdi. 1 mart - Beynəlxalq Mülkü
Müdafiə gününün əhəmiyyəti barədə məlumat verdi. O,
dövlətimizin bu sahəyə olan diqqətindən danışdı.
Tədbirdə iştirak edən qonaqlar da mülki müdafiə günü
haqqında danışaraq belə tədbirlərin təhsil ocaqlarında
keçirilməsini yüksək qiymətləndirdilər.
Tədbirin sonunda mülki müdafiə təlimlərində iştirak edən
şagirdlərə diplomlar təqdim olundu.
Rəşad ZİYADOV |