Coşqun Əzimov 1994-cü il sentyabrın 9-da İmişli rayonunun Qaralar kəndində anadan olub. Hazırda İmişli şəhər 1 nömrəli humanitar fənlər təmayüllü məktəb-liseyin XI sinif şagirdidir. O, 8 yaşından Azərbaycanın əməkdar məşqçisi Qalib Şükürovun rəhbərlik etdiyi sərbəst güləş bölməsində ustalığını artırır.

Onun müxtəlif illərdə idman yarışlarında qazandığı nailiyyətlərdən fəxrlə söhbət açan fiziki tərbiyə müəllimi Fazil Seyfəliyev bildirib ki, Coşqun İran İslam Respublikasının Təbriz şəhərində keçirilən turnirdə uğurla çıxış edərək I yerin sahibi olub. 1994-95-ci il təvəllüdlü idmançılar arasında respublika turnirində qalib gələrək I yeri, Müşviq İsayevin xatirəsinə həsr olunmuş sərbəst güləş üzrə Beynəlxalq turnirdə isə  II yeri tutub.

O, Azərbaycan Güləş Federasiyasının kuboku uğrunda sərbəst və yunan-Roma güləşi üzrə yeniyetmə və gənclər arasında keçirilən beynəlxalq turnirdə ikinci nəticə, Bakı şəhərində sərbəst güləş üzrə respublika birinciliyində isə III yeri tutaraq gümüş və bürünc medallara layiq görülüb. Coşqun dəfələrlə Gənclər və İdman Nazirliyinin, Azərbaycan Güləş Federasiyasının diplom və medallarına da layiq görülüb. 

Onu da deyək  ki, 2012-ci  ilin "İdman ili" elan olunması onu daha yüksək qələbələr qazanmağa ruhlandırır. Coşqunun ən böyük arzusu lisenziyalara sahib olaraq Olimpiya oyunlarında iştirak etməkdir. Biz də Coşqunun yüksək zirvələr fəth edəcəyinə, arzularının çin olacağına inanırıq. 

ƏDALƏT