Heydər
Əliyev Fondunun dəvəti ilə Bakıda olan M.İ.Rudomino
adına Ümumrusiya Xarici Ədəbiyyat Dövlət Kitabxanasının
baş direktoru, YUNESKO-nun eksperti Yekaterina Qeniyeva
və kitabxananın digər nümayəndələri martın 13-də Bakı
Slavyan Universitetində professor-müəllim kollektivi ilə
görüşmüşlər.
Rusiyanın ən böyük ictimai və elmi kitabxanalarından
olan bu kitabxananın nadir profilli fondu onun Rusiya
kitabxanaları sırasında xüsusi yerini müəyyənləşdirir.
Fondunda 100 nüsxə kitab ilə fəaliyyətə başlayan
kitabxanada hazırda 144 dildə 5 milyondan çox xarici
ədəbiyyat və dövri nəşriyyat nümunələri toplanmışdır.
Tədbiri giriş sözü ilə açan BSU-nun rektoru, AMEA-nın
müxbir üzvü, professor Kamal Abdullayev rusiyalı
qonaqlara universitet haqqında ətraflı məlumat verərək
demişdir: "Sizin kitabxananız Rusiyanın təkcə
elmi-mədəni həyatında deyil, həm də siyasi həyatında
mühüm rola malikdir". BSU-nun tərcümə fakültəsində
təhsil alan tələbələrin gələcəkdə sözügedən kitabxananın
Tərcümə mərkəzində ixtisasartırması ilə bağlı kitabxana
müdiriyyəti ilə razılıq əldə etdiyini vurğulayan rektor
bu gözəl görüşə şərait yaratdığına görə Heydər Əliyev
Fonduna dərin təşəkkürünü bildirmişdir.
Novruz bayramı ərəfəsində Bakıya səfər etməkdən
məmnunluğunu gizlətməyən Y.Qeniyeva görüş
iştirakçılarını bayram münasibətilə təbrik edərək
demişdir: "Bakıda olduğumuz müddətdə əmin olduq ki, rus
dili Azərbaycanda çox geniş işlənir, bu da bizim
üzərimizə böyük öhdəliklər qoyur. Biz rus dilinin
Azərbaycanda yaşaması və inkişafı üçün əlimizdən gələni
etməyə hazırıq".
Rəhbərlik etdiyi kitabxana haqqında ətraflı məlumat
verən Y.Qeniyeva həm də bu kitabxanada Azərbaycan
Mədəniyyət Mərkəzinin postsovet ölkələri arasında yeganə
mərkəz olduğunu qeyd edərək bildirmişdir ki, bu mərkəz
Heydər Əliyev Fondunun köməkliyi ilə açılmışdır.
Y.Qeniyeva rəhbərlik etdiyi kitabxana ilə BSU arasında
geniş əməkdaşlıq haqqında hazırlanan müqaviləyə
toxunaraq bu istiqamətdə mühüm addımlar atılacağına əmin
olduğunu vurğulamışdır. Müqavilədə səyyar kitab
sərgilərinin keçirilməsi, BSU-da müasir rus
ədəbiyyatının ən görkəmli nümayəndələri ilə görüşlərin
təşkili, tələbələrin təcrübə keçməsi, universitet
kitabxanasının yeni nəşrlərlə zənginləşdirilməsi, kitab
mübadiləsinin təşkili və digər birgə layihələr nəzərdə
tutulmuşdur.
Y.Qeniyeva qonaqlar adından gözəl Bakı şəhərini görməyə
imkan yaratdığına görə Heydər Əliyev Fonduna
minnətdarlığını bildirmişdir.
Sonda moskvalı qonaqlar BSU-nun yenidən qurulmuş
kitabxanası ilə tanış olmuşlar.
AzərTAc |