Bu günlərdə Bakıdakı 236 nömrəli tam orta məktəbdə xalqımızın sevinc və şadlıq bayramı olan Novruza həsr olunmuş tədbir keçirildi. Tədbir məktəbin IX sinif şagirdləri və təşkilatçı müəllimləri tərəfindən hazırlanmışdı.

Mərasimi giriş sözü ilə açan məktəbin direktoru Xanlar İmaməliyev iştirakçıları bayram münasibəti ilə təbrik etdi. O, xalqımızın milli bayramı olan Novruzun tarixinə nəzər salaraq bildirdi ki, bu bayram əsrlərin qaynağından süzülüb gələn, yaddaşlarda kök salan qədim el bayramıdır.  Bu milli bayramımızın indi dövlət səviyyəsində geniş qeyd olunması Azərbaycanın müstəqilliyinin bəhrələrindəndir.

Sonra doqquzuncuların fizika fənni üzrə bilik yarışı başlandı. Novruz bayramına həsr olunan yarışda IX "e" sinfinin "Elm" komandası ilə IX "d" sinfinin "Dostluq" komandası maraqlı proqramla çıxış etdilər. Hər iki komanda bu bilik yarışında fəal iştirak etsə də, ixtisas müəllimlərindən ibarət münsiflər heyətinin qərarı ilə "Dostluq" komandası qalib elan olundu və bu komanda Səngəçal terminalının nəzdindəki muzeyə ekskursiya etmək şansı əldə etdi. Eyni zamanda məktəbin fizika müəllimi Qıztamam Yaqubovanın rəhbərliyi ilə hazırlanmış bu yarış proqramı öz intellektual səviyyəsinə, şagirdlərin bilik və bacarığından məharətlə istifadə edildiyinə görə böyük marağa səbəb oldu və münsiflər heyəti tərəfindən yüksək dəyərləndirildi.

Bu bahar təravətli tədbirdə şagirdlər Novruzla bağlı müxtəlif səhnəciklər və əyləncəli oyunlar göstərdilər. Mahnılar oxundu və şeirlər söyləndi. Sonra Novruzun əsas atributları olan Kosa ilə Keçəl öz məzəli çıxışları ilə tədbir iştirakçılarında xoş ovqat yaratdılar. 

Ədalət DAŞDƏMİRLİ