Martın 14-də Bakıdakı 54 nömrəli tam orta məktəbdə VMA-nın təşkilatçılığı ilə Novruz bayramına həsr olunan "Bahar gəlir yurdumuza" adlı tədbir  keçirildi. Bayram münasibətilə tədbir iştirakçılarını təbrik edən məktəbin direktoru Sahibə  Abbasova Novruzun tarixi haqqında  məlumat verdi.

Tonqala od vuruldu. Bahar qızı, Kosa və Keçəl  şagirdlərin  toplaşdığı məktəbin həyətinə daxil oldular. Onlar milli rəqslər ifa edərək xalq inanclarından, deyimlərindən söylədilər, bayrama aid müxtəlif səhnəciklərlə tədbiri  daha da yaddaqalan və maraqlı etdilər. Xüsusilə  Nəsimi  rayon H.Sarabski adına mədəniyyət evi işçilərinin şagirdlər üçün hazırladığı  konsert proqramı  valideynlər və şagirdlər tərəfindən böyük alqışlarla  qarşılandı.

Şənlikdə şagirdlərin hazırladığı milli bayrama aid rəngarəng şəkillər və əl işləri də  nümayiş olundu.

Tədbir şagirdlərin ifasında bir-birindən maraqlı rəqs nömrələri və Novruza həsr olunan şeirlərlə başa çatdı.  

Şakir CƏFƏROV