Bakının Xəzər rayonundakı  şəhid Rəşid Baxışovun adını daşıyan 218 nömrəli tam orta məktəbin pedaqoji kollektivi  Novruz  bayramı ilə əlaqədar xeyriyyəçilik təşəbbüsü göstərib. Məktəbdə təhsil alan aztəminatlı ailələrin övladları müəyyənləşdirilmiş və onlara bayram sovqatı göndərilmişdir. Müəllimlərin iştirakı ilə 60 ailəyə Novruz sovqatı verilmiş, valideynlər pedaqoji kollektivin adından təbrik olunmuşdur.

Məktəbin direktoru Natavan Əliyeva bildirdi ki, biz imkansız valideynlərə bayram xonçası göndərmək, onları hamımız üçün əziz olan Novruz bayramı münasibətilə təbrik etmək təşəbbüsünü irəli sürəndə pedaqoji kollektivin bütün üzvləri böyük həvəslə bu təşəbbüsə qoşuldular. Artıq 60 ailəni Novruz bayramı ərəfəsində sevindirmişik.

Qeyd edək ki, pedaqoji kollektiv buna qədər daha bir neçə xeyriyyəçilik tədbiri həyata keçirib. Aztəminatlı ailələrdən olan 15 şagirdin bütün məktəbli ləvazimatı da pedaqoji kollektivin səyi ilə alınıb. Sevindirici haldır ki, xeyriyyəçilik işlərində məktəbin bütün kollektivi iştirak edir. Artıq bu, məktəbdə ənənə halını alıb.

218 nömrəli tam orta məktəb ötən əsrin 70-ci illərindən fəaliyyət göstərir. Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin  deputatı Mehriban xanım Əliyevanın təşəbbüsü  ilə 1176 yerlik məktəb binası tikilərək şagirdlərin və pedaqoji kollektivin ixtiyarına verilmişdir. Ötən dərs ilində möhtərəm Prezidentimiz İlham Əliyevin və  Heydər Əliyev Fondunun prezidenti Mehriban xanım Əliyevanın iştirakı ilə ən müasir avadanlıqlarla təmin olunmuş məktəbin açılışı olmuşdur. Pedaqoji kollektiv də öz fəaliyyəti və xeyriyyəçilik təşəbbüsləri ilə onlara göstərilən diqqət və qayğını, etimadı doğruldur. 

Əliqismət BƏDƏLOV