Bu gün böyütdüyümüz, tərbiyə etdiyimiz uşaqlar yaxın
gələcəkdə cəmiyyətin tamhüquqlu üzvü, aparıcı qüvvəsi
olacaq, bizim yaratdıqlarımızı inkişaf etdirəcəklər.
Qarşımızda oturub bizdən elm, savad, bilik almaq
istəyən şagirdlərimizi biz sadəcə olaraq yeni biliklərlə
zənginləşdirməli deyilik, həm də onların məntiqi
təfəkkürünü, lazım olan məlumatı, bilikləri müstəqil
əldə etmək, seçib qiymətləndirə bilmək, onları real
həyatda tətbiq edə bilmək, həm sərbəst, həm də birgə
işləyə bilmək, ünsiyyət qurmaq, ətrafında baş verənlərə
obyektiv qiymət verə bilmək, problemli situasiyalarda
çıxış yolu tapmaq bacarıqlarıni inkişaf etdirməliyik.
Gələcəyimizi əmanət edəcəyimiz bu nəsli düzgün,
mütərəqqi fikirli, hərtərəfli və dərin biliyə malik,
fiziki və mənəvi cəhətdən sağlam, XXI əsrin tələblərinə
cavab verəcək şəxsiyyət kimi yetişdirməliyik.
Azərbaycanda təhsil sisteminin informasiyalaşdırılması
sahəsində xeyli iş görülüb. "2008-2012-ci illərdə
Azərbaycan Respublikasının təhsil sisteminin
informasiyalaşdırılması üzrə Dövlət Proqrami" işlənib
hazırlanmış, məktəblər kompüter avadanlıqları ilə,
sürətli İnternetlə təmin edilmiş, Milli Təhsil Portalı,
müasir elektron tədris vasitələri yaradılmış, "Elektron
məktəb" pilot layihəsi, "1 şagird - 1 kompüter" layihəsi
həyata keçirilməyə başlamışdır.
Bu silsilədən olan bir layihə də "Microsoft"
korporasiyası tərəfindən dünyada yayılan və müəllimlər
üçün nəzərdə tutulmuş "Həmkara dəstək" proqramıdır.
Biz şagirdlərin birgə işləmək, ünsiyyət qurmaq,
əməkdaşlıq etmək bacarıqlarının aşılanıb inkişaf
etdirilməsinin nə qədər zəruri olduğunu başa düşürük.
Lakin bu işdə uğurlu, gözlənilən nəticəyə çatmaq üçün bu
gün müəllimlərimizin də birgə işləməyə, bildiklərini
başqaları ilə paylaşmağa və başqalarının bacarıqlarından
yararlanmağa ehtiyacı var. Əlbəttə, həmkar dəstəyinə
əsaslanan sistemli, planlaşdırılmış bir işin icrası daha
asan, sürətli olar və müəllimlər dərs prosesində
qarşılaşdıqları problemləri çözməkdə etibar edə
biləcəkləri təcrübəli həmkarın yardımından daha çox
faydalana biləcəklər. Təlimçi müəllimlər həmkarlarının
ehtiyaclarını öyrənir, onlarla birgə işləyir və bu
əməkdaşlıq təlim prosesində müəllimlərin rastlaşdıqları
çətinlik və ehtiyacları aradan qaldırmağa yardım edir.
Məlumdur ki, müəllimlərin birgə əməkdaşlığı onların öz
işlərində irəliləyiş əldə etmələrinə təkan verir. "Həmkara
dəstək" proqramı sayəsində müəllimlər işlədikləri
məktəbdə təlim metodlarını təkmilləşdirməyə yardım edən
bir sistemə malik olmuş olacaqlar. Bu sistem tədris
prosesinin effektivliyini artırmağa, təlimdə
texnologiyanın imkanlarından daha geniş istifadə etməyə,
şagirdlərin texnologiya savadının artırılmasına yardım
edəcəkdir. Və məlumdur ki, şagirdin bu sahədəki inkişafı
onun araşdırıcılıq qabiliyyətini, toplamış olduğu
materialı sintez etmək, sistemləşdirmək, təhlil etmək,
nəticə çıxarmaq bacarığını da təkmilləşdirir.
"Həmkara dəstək" layihəsi Azərbaycanda "Mədəd"
təşkilatının və "Microsoft Azərbaycan" şirkətinin
təşəbbüsü və maliyyə dəstəyi ilə həyata keçirilməyə
başlamışdır. Artıq bu proqram üzrə bir sıra təhsil
müəssisələrində təlimlər keçirilmiş, yerlərdə fəaliyyət
göstərəcək təlimçilər seçilmişdir.
Bu gün bu təlimlər Quba şəhər Z.Cəfərov adına 3 nömrəli
tam orta məktəbində keçirilir. Təlimlər iştirakçıların
böyük marağına səbəb olmuşdur. Məktəbdə müəllimlərin və
şagirdlərin İKT-dən istifadəetmə səviyyəsi müxtəlifdir.
Ümid edirik ki, məktəbdə sonradan həyata keçiriləcək
müəllim əməkdaşlığı müəllimlərimizin tədris prosesini
effektivləşdirməyə, İKT-nin səmərəli tətbiqinə böyük
yardım edəcəkdir.
Dərslərdə İKT-nin tətbiqi ilə şagirdlər online ünsiyyət
qurmaq, uzaq məsafədə olan qruplarla ideyaları bölüşmək,
verilən yaradıcı tapşırıqları yerinə yetirərkən təkcə öz
icmasının deyil, həm də digər məktəblərdən, ölkələrdən
olan yaşıdları ilə əməkdaşlıq etmək imkanlarına malik
olurlar.
Bu proqram müəllimlərin öz dərslərini keyfiyyətli
təşkil edə bilmələrinə, ümumilikdə təhsildə müsbət
dəyişikliklərə stimul verəcəkdir.
Gülnarə AŞUROVA,
Quba şəhər 3 nömrəli tam orta məktəbin ingilis dili
müəllimi |