Bu günlərdə Sumqayıtdakı N saylı hərbi hava qoşunları mühafizə dəstəsinin əsgərləri ilə əmək veteranları və Sumqayıt şəhər 5 nömrəli tam orta məktəbin şagirdlərinin görüşü keçirilib.

Tədbirdə məktəbin direktoru Esmira İbrahimova, Sumqayıt şəhər təhsil işçiləri veteranlar şurasının sədri Məşdi Zeynalov, şəhər mühafizə, əmək, silahlı qüvvələr və hüquq mühafizə orqanları veteranlar şurasının sədri, əməkdar müəllim Leyla Qasımzadə, veteran müəllimlər- Qızbəs Şirinova, Hətəm Mahmudov, məktəbin kitabxanaçısı Zahidə Qəhrəmanova, biologiya müəllimi Rəfiqə Abbasova, təşkilatçı Mehriban Musayeva çıxış edərək Azərbaycanın qəhrəman oğullarının rəşadətli döyüş yollarından söhbət açıb və onlara Vətənin keşiyində ayıq-sayıq dayanmağı tövsiyə ediblər.

Sonra məktəbin özfəaliyyət kollektivinin üzvləri əsgərlər üçün tamaşa göstərib, bahar təravətli mahnılar ifa ediblər.

Görüşdə əsgərlərdən Tural Novruzovun, Mehrəli Məmmədovun, Cəlil Hüseynovun ifa etdikləri mahnılar iştirakçıların alqış sədaları ilə qarşılanıb.

Tədbirdə mühafizə bölüyünün əsgərləri - Əfqan Əhmədov, Səxavət Abdullayev, Həsən Səfərzadə  çıxış edərək, nümunəvi xidmət edəcəklərinə söz veriblər. Kapitan Niyazi Adıgözəlov və baş gizir Çingiz Yusifov isə belə görüşlərin keçirilməsinin böyük əhəmiyyəti olduğunu vurğulayıblar.

Həmin gün görüş iştirakçıları hərbi hissədə əsgərlərin, hərbi qulluqçuların yatacağı, qidalanması və geyimləri ilə  bağlı onlara göstərilən nümunəvi xidmətlə də tanış olublar.

Tədbirin sonunda 5 nömrəli tam orta məktəbin müəllim və şagirdləri hazırladıqları bayram sovqatlarını əsgərlərə təqdim edərək onlarla birlikdə xatirə şəkli çəkdiriblər. 

Ədalət DAŞDƏMİRLİ