Aprelin 5-də Azərbaycan Dillər  Universitetində  FİFA "U-17 qadınlararası dünya çempionatı Azərbaycan 2012"-nin Yerli Təşkilat Komitəsinin nümayəndələri tələbələrlə görüş keçirdi.  Təqdimat mərasimində çıxış edən ADU-nun tərbiyə işləri üzrə prorektoru Ələddin Əliyev Azərbaycanda son 10 ildə idmanın sürətlə inkişaf etdiyini və dövlət başçısının bu sahəyə xüsusi diqqət ayırdığını bildirdi.  Ölkəmizin bir sıra aparıcı idman növləri üzrə keçirilən beynəlxalq yarışlara ev sahibliyi etdiyini deyən prorektor bu il ölkəmizdə 17 yaşlı qadınlar arasında dünya çempionatının keçiriləcəyini  tələbələrin diqqətinə çatdırdı. Ə.Əliyev Azərbaycanın tanıdılmasında və nüfuzunun artmasında idmanın mühüm rol oynadığını vurğuladı. Prorektor ADU-nun tələbələrinin ölkəmizdə keçirilən beynəlxalq tədbirlərdə fəal iştirak etdiyinə də toxundu.

FİFA "U-17 qadınlararası dünya çempionatı Azərbaycan 2012"-nin Yerli Təşkilat Komitəsinin (YTK) "Könüllülük proqramı"nın direktoru Vüqar Rüstəmli  və proqramın nümayəndəsi Nərmin Abbasova çempionatın ümumi tanıtımı və "Könüllülük proqramı" haqqında tələbələrə ətraflı məlumat verdilər. Təqdimatda çempionata hazırlıq çərçivəsində görülən işlər, bu tip beynəlxalq tədbirin ölkəmiz üçün əhəmiyyətindən danışıldı. V.Rüstəmli FİFA-nın dünya çempionatları, qadın futbolu, Azərbaycanda keçiriləcək çempionatın gedişatı, oyunların təşkil olunacağı stadionlar, rəsmi markalar, eləcə də 17 yaşadək qızlardan ibarət milli yığmamızdan bəhs etdi.

Gənclərə dünya çempionatında yaradılmış geniş imkanlardan söz açan proqram rəhbəri tələbələri "Könüllülük proqramı"nda aktiv iştirak etməyə çağırdı. O, könüllü olmağın xeyirləri, perspektivləri və proqramda iştirak şərtləri ilə bağlı tələbələri məlumatlandırdı.

Təqdimat zamanı YTK əməkdaşları tərəfindən ünvanlanan sualları cavablandıran tələbələr dünya çempionatını özündə əks etdirən müxtəlif növ hədiyyələr qazandılar.

ADU-nun Mətbuat xidməti