Heydər Əliyev Fondu, Rabitə və İnformasiya Texnologiyaları Nazirliyi, Təhsil Nazirliyi və AMEA-nın İnformasiya Texnologiyaları İnstitutunun birgə təşkilatçılığı ilə 17 May - Ümumdünya Telekommunikasiya və İnformasiya Cəmiyyəti Gününə həsr olunan "Ali məktəb tələbələri arasında informatika üzrə Ümumrespublika Olimpiadası"na start verilib.

Bu tədbirin keçirilməsində başlıca məqsəd gənclərin İKT hazırlığının daha da təkmilləşdirilməsi, kompüter proqramlaşdırması  sahəsində istedadlı və qabiliyyətli gənclərin aşkara çıxarılması, informatika və proqramlaşdırma üzrə keçirilən Beynəlxalq Olimpiadalarda iştirak etmək üçün komandaların seçilməsidir.   Beynəlxalq olimpiadaların formatına uyğun keçirilən bu olimpiada komandaların yarışmasıdır. Hər komandada 3 nəfər tələbə təmsil olunur.

Yarış zamanı hər komandaya 1 kompüter ayrılır və 5 saat ərzində 5-10 məsələni həll etmək tapşırığı verilir. Məsələlərin həllinin yoxlanması və qiymətləndirilməsi üçün proqramlaşdırma üzrə beynəlxalq olimpiadalarda tətbiq olunan Avtomatik Qiymətləndirmə Sistemindən istifadə olunur. Komandalar məsələlərin həllini Free Pascal, Borland C++ və Borland Pascal kimi proqramlaşdırma dillərindən birində yazırlar və proqramın mətnini yoxlamaq üçün serverə göndərirlər. Sistem məsələnin həllini dərhal yoxlayır və nəticənin səhv və ya düzgün olması barədə məlumatı serverdən iştirakçının kompüterinə göndərir.

Qeyd edək ki, bu sistem münsiflər heyətinin işini xeyli yüngülləşdirir. Belə ki, yarış iştirakçıları tərəfindən göndərilən həll edilmiş məsələləri yoxlamaq və nəticəni onlara bildirməklə yanaşı, həm də avtomatik olaraq həll olunmuş məsələlərin hesabatını aparır, balları hesablayır və iştirakçıların reytinqini tərtib edir. Onu da qeyd edək ki, olimpiada vaxtı komandalar digər bütün komandaların nəticələr cədvəlinə baxa bilirlər.  2007-ci ildən müntəzəm keçirilən bu olimpiadanın 15 aprel 2012-ci il tarixində Qafqaz Universitetində keçirilmiş ilk mərhələsində respublikanın 15 ali təhsil müəssisəsindən 45 komanda iştirak edib.   İlk mərhələnin nəticələrinə görə, olimpiadanın ikinci (final) mərhələsinə respublikanın 4 ali təhsil müəssisəsindən 12 komanda vəsiqə qazanıb. Bununla yanaşı, Beynəlxalq İnformatika Olimpiadalarında Azərbaycan komandasının rəhbəri, Bakı Dövlət Universitetinin dosenti Ramin Mahmudzadənin rəhbərlik etdiyi münsiflər heyətinin qərarına əsasən cari ildə olimpiadanın ilk mərhələsində regionlardan qoşulan komandaların aktivliyi nəzərə alınaraq, finala müsabiqədən kənar 9 komanda da dəvət olunub.  

Olimpiadanın final mərhələsinin 29 aprel 2012-ci il tarixində AMEA-nın İnformasiya Texnologiyaları İnstitutunda keçirilməsi nəzərdə tutulub.  Olimpiadada ilk 4 yerə layiq görülən komandalar Azerfon və BestComp Group şirkətlərinin təqdim etdiyi qiymətli hədiyyələrlə mükafatlandırılacaqlar.