Bu günlərdə Bakıdakı N.İsmayılov adına 80 nömrəli tam orta məktəbdə "Tarixlə ədəbiyyatın dostluğu" adlı ədəbi-bədii gecə keçirildi. Tarix müəllimi Nargilə Əhmədova və dil-ədəbiyyat müəllimi Rasimə Nağıyevanın uzunmüddətli axtarışları və böyük zəhmətlərinin bəhrəsi olan tədbir iştirakçılarda zəngin təəssürat yaratdı.

Gecədə çıxış edən şagirdlər dünya yaranandan bəri tarix və ədəbiyyatın bir-birilə sıx bağlılığından bəhs etdilər. Çıxışlarda Azərbaycanın tarixini yaradan şəxsiyyətlərin, qüdrətli hökmdarların həm də incə ruhlu, kövrək qəlbli şair kimi tanındıqlarının heç də təsadüfi olmadığı vurğulandı. Həsənoğlu, Qazi Bürhanəddin, Cahanşah Həqiqi və nəhayət, Şah İsmayıl Xətainin həyatı haqqında verilən məlumatlarla yanaşı, onların hər birinin yaradıcılığından ifa olunan bədii nümunələri - lirik şeirləri iştirakçılar çox böyük maraqla dinlədilər.

Gecədə Cəfər Cabbarlının "Od gəlini" və Hüseyn Cavidin "İblis" əsərlərindən səhnəciklər təqdim olundu. Şagirdlər Babəkin, Teymurləngin obrazlarını məharətlə canlandırdılar.

Tədbir boyu Azərbaycanın keçmişi və müasir dövrü ilə bağlı slaydlar nümayiş etdirildi. Xüsusən, müstəqil Azərbaycanın qurucusu, ulu öndər Heydər Əliyevin həyatı və siyasi fəaliyyəti ilə bağlı görüntülər iştirakçıların böyük marağına səbəb oldu. Gecənin ən yaddaqalan məqamlarından biri də qızlar və oğlanlardan ibarət iki komandanın bir-biri ilə yarışması idi. Müəllimlərdən ibarət münsiflər heyəti komandaların qabiliyyətini qiymətləndirərkən şagirdlərin tarix və ədəbiyyatla bağlı suallara dolğun və ətraflı cavab verdiklərini, onların bu iki fənnə maraq göstərmələrini təqdirəlayiq hal kimi dəyərləndirdi.

Tədbirin sonunda məktəbin direktoru Əlislam Abasquliyev ən fəal şagirdlərə fəxri  fərman təqdim etdi. Gecədə eyni zamanda bilik yarışmasının məktəb və rayon turunun qalibləri də mükafatlandırıldı. Bu yarışmanın rayon turunda tarix və ədəbiyyat fənləri üzrə 1-ci yerə layiq görülən 8-ci sinif şagirdləri Günel Nağıyeva və Aydan Nağıyevaya xüsusi hədiyyələr verildi.

Tədbirdə iştirak edən Bakı Şəhəri üzrə Təhsil İdarəsinin nümayəndəsi Fərman Abdullayev bu işdə əməyi olan fənn müəllimlərinə və şagirdlərə təşəkkürünü bildirdi. 

Hicran ƏKBƏROVA