Bakıdakı 238 nömrəli tam orta məktəbdə IV sinif üçün  "Azərbaycan dili" dərsliyinin müəlliflərindən olan Rafiq İsmayılov və Solmaz Abdullayevanın iştirakı ilə "Dərslik əhəmiyyətli tədris vasitəsidir" mövzusunda "dəyirmi masa" keçirildi. Tədbirdə Bakı Şəhəri üzrə Təhsil İdarəsi Metodik Mərkəzinin Nizami - Nərimanov metodik bölməsinin metodisti Validə Rzaməmmədova, məktəb direktorları, KİV nümayəndələri və digər qonaqlar iştirak edirdilər.

Əvvəlcə qonaqlar "Riyaziyyat" və "Azərbaycan dili və ədəbiyyat" fənn aylıqları çərçivəsində məktəbdə görülən işlər, şagird və müəllimlərin yaradıcılıq nümunələri, 20 Yanvar,  Xocalı və 31 mart soyqırımı qurbanlarının xatirəsinə həsr olunmuş divar qəzetlərindən və fotolardan ibarət sərgi ilə tanış oldular.

Tədbiri giriş sözü ilə açan məktəbin direktoru İlqar Talıbov bildirdi ki, sivilizasiyalı cəmiyyətin qurulmasında, müasir, azad və tənqidi düşünmə gücünə, geniş dünyagörüşünə sahib,  şüurlu, yaradıcı nəsillərin yetişməsində dərsliklərin rolu böyükdür. Çıxış edən Rafiq İsmayılov bildirdi ki, dərsliyin müəllifi biz olsaq da,  dərsin müəllifi siz müəllimlərsiniz. Ana dilinin öyrənilməsi şagirdlərin ünsiyyət qabiliyyətlərini genişləndirir, onlarda nitq mədəniyyətini formalaşdırır.   Yeni dərsliklərdən istifadə etməklə öyrənmə və öyrətmə prosesini daha əyani görmək üçün ibtidai sinif müəllimi Zümrüd Bayramovanın IV sinifdə Azərbaycan dili fənnindən keçdiyi  "Ən böyük dövlət" mövzusunda "açıq dərs"i dinlənildi.  Dərsdən sonra müzakirələr aparıldı. Dinlənilən dərs təhlil edilərək müsbət cəhətləri qeyd edildi,  bəzi tövsiyələr verildi.

Müzakirələrdən sonra məktəbin ibtidai sinif müəllimi İradə Bayramova "Dərslik əhəmiyyətli tədris vasitəsidir" mövzusunda çıxış etdi.

İbtidai sinif müəllimləri S.İsmayılova, Z.Rzayeva, G.Tağıyeva dərsliklərlə bağlı arzu və təkliflərini bildirdilər. Müəllimləri maraqlandıran suallar dərslik müəllifləri tərəfindən cavablandırıldı.  

Rəşad ZİYADOV