Azərbaycan Dillər Universitetində  təcrübə mübadiləsinə həsr olunmuş "dəyirmi masa" keçirildi.  Məqsəd ADU və Böyük Britaniyanın Esseks Universitetlərinin təhsil proseslərini müqayisə etmək və  təcrübə mübadiləsi aparmaq idi.

Tədbiri giriş sözü ilə açan 2 saylı ingilis dili fakültəsinin dekanı, dosent Vəfa Bənnayeva ADU ilə  Esseks Universiteti arasındakı əməkdaşlıqdan danışdı.  Xarici dillərin tədrisi metodikası kafedrasının müdiri,  professor Gülnar Hüseynzadə Esseks Universitetində 2 həftə təcrübədə olduğunu bildirib,  bu müddət ərzində keçilən dərslərdən  söz açdı. İngilis dilinin leksikası və ölkəşünaslıq kafedrasının müdiri, professor Məsməxanım Qazıyeva, həmin kafedranın baş müəllimi Sevinc Seyidova Esseks Universiteti, buradakı təhsil sistemi və universitetdə tələbələrin seçim imkanları barəsində danışdılar.

Sonda Esseks Universitetində təcrübə zamanı çəkilmiş şəkillərdən ibarət fotoslayd nümayiş olundu və suallar cavablandırıldı.   Xatırladaq ki, Azərbaycan Dillər Universiteti və Böyük Britaniyanın Esseks Universiteti arasında əməkdaşlıq müqaviləsi imzalanmışdır. Müqaviləyə əsasən, Azərbaycan Dillər Universitetinin ingilis dili fakültəsinin tələbələri II kursu bitirdikdən sonra təhsillərini Esseks Universitetində davam etdirəcəklər və ikili diplom alacaqlar.  

 Şakir CƏFƏROV