Bu günlərdə Şamaxı şəhər 2 nömrəli tam orta məktəbdə dahi Azərbaycan şairi Nizami Gəncəvinin 870 illik yubileyinə həsr olunmuş "Nizami dünyası" adlı ədəbi-bədii gecə keçirilib.

Tədbiri giriş sözü ilə açan məktəbin direktoru İ.Baxşiyev qeyd edib ki, Nizami yaradıcılığı səkkiz əsrdən artıqdır ki, xalqımızın mənəviyyatının ayrılmaz hissəsinə çevrilmişdir. Nizami irsi uzun zamanlardan bəri dünya elmi-ədəbi fikrinin diqqət mərkəzindədir. Ölkəmizdə dahi şairin əsərləri dəfələrlə nəşr olunmuş, ədəbi irsinin öyrənilməsi və tanıdılması sahəsində xeyli iş görülüb. Ümummilli liderimiz Heydər Əliyev Nizami Gəncəvi haqqında demişdir: "Nizami Gəncəlidir, Nizami deyiləndə Gəncəni düşünürsən... Nizami Gəncəvi elə bir böyük şəxsiyyətdir ki, elə bir dahidir ki, onun yubileyini nəinki on ildən, beş ildən bir, hər il qeyd etmək lazımdır".

Məktəbin Azərbaycan dili və ədəbiyyat müəllimləri A.Həsənova, S.Babayeva, G.Şükürova, K.Abdurahmanova, B.Quliyeva, K.Səfərova, D.Nuriyeva və ibtidai sinif müəllimi V.İsrafilovanın təşkilatçılığı ilə keçirilən bu tədbirdə şairin həyat və yaradıcılığı, fəlsəfi görüşləri barədə geniş söz açılıb.

Ədəbi-bədii gecədə məktəbin şagirdlərinin ifasında dahi şairin şeirlərindən və hikmətli sözlərindən nümunələr söylənilib, əsərlərindən rəngarəng səhnəciklər göstərilib, sözlərinə bəstələnmiş romanslar ifa olunub. 

Günel ŞÜKÜROVA,
Şamaxı şəhər 2 nömrəli tam  orta məktəbin müəllimi