Aprelin 21-də Azərbaycan Dillər Universitetində
ümummilli lider Heydər Əliyevin anadan olmasının 89-cu
ildönümünə həsr edilmiş Tələbə Elmi Cəmiyyətinin illik
konfransı başa çatdı. Konfransda müxtəlif mövzular üzrə
22 bölmədə iclaslar keçirilib, 1000-ə yaxın məruzə
dinlənilib.
Yekun iclasında ADU-nun elmi işlər üzrə prorektoru,
professor Dünyamin Yunusov tələbələrin elmlə məşğul
olmağa üstünlük verdiklərini və bunun da onların
gələcək inkişafında mühüm rol oynayacağını bildirdi.
Bölmə rəhbərlərinin hesabatları vaxtında təqdim etdiyini
deyən prorektor onların işini yüksək qiymətləndirdi. O,
ADU-nun rektoru, millət vəkili, professor Səməd
Seyidovun adından bölmə rəhbərlərinə, eləcə də
tələbələrə təşəkkür etdi və gələcək fəaliyyətlərində
uğurlar arzuladı.
Konfransda müxtəlif mövzularla iştirak edən tələbələrin
40 nəfəri I, 38 nəfəri II, 48 nəfəri isə III dərəcəli
diplomlarla təltif edildi. Bundan əlavə, konfransda
iştirakına görə 173 nəfər tələbəyə təşəkkür elan edildi
və 27 tələbə isə Tələbə Elmi Cəmiyyətinin respublika
konfransında iştirak etmək hüququ qazandı.
Şakir CƏFƏROV |